Promocións, propostas
Segundo sinalastes no PASquín anterior, un dos sindicatos opta por dicir que si á conservación da nota de probas anteriores deixando a responsabilidade da decisión no asesoramento da universidade. Isto paréceme de todo punto improcedente, non teñen asesoría xurídica propia?. Fágome unha pregunta. E se á universidade lle interesara que non seguisen adiante as promocións?. Con esta alternativa pónselle moi fácil o procedemento, non ten máis que seguir coas convocatorias tal e como está contemplado na proposta e xa se encargarían os xulgados de paralizalas. Reitero que me parece improcedente, incluso raro que ese sindicato non pida asesoramento da súa asesoría antes de tomar a posición nas reunións coa Xerencia.

Innecesario
Son unha das persoas que aprobou sen praza na convocatoria anterior a C1, entendo que cando haxa competencia polas prazas non se conserve o aprobado pero, no caso como o noso no que non prexudicamos a ninguén, facernos pasar outra vez pola proba paréceme inhumano porque, á súa vez, é innecesario.

Rectificación
Agradezo que alguén cando se equivoca pida desculpas, errar está ao alcance de calquera, o asunto é rectificar. No caso que me trae a escribirvos, o das promocións, aínda houbo tempo para rectificar, polo tanto o dano infrinxido pode cicatrizar. O importante, o que me parece salientable, é que a vosa “autocrítica” debe ser a primeira que se fai nesta universidade. Está ben rectificar pero para outra vez tratade de non caer na improvisación, non volvades a facer as cousas do xeito atropelado como se fixo nesta ocasión.