24/05/2010
CUTUDC / Novidades
ACTUALIDADE
Colaboracións
Máis colaboracións, estádesvos a esmerar, seguir compartindo o voso pensamento.
Síntoo, son funcionario
Sinto ser un cidadán que cre nos intereses xerais e en que traballar para a Administración é algo máis que ter un salario seguro. Sinto moito crer que se os servizos públicos funcionan é porque detrás deles hai moitas persoas que se esforzan cada día.
Pero o que máis sinto é que, cando as cousas veñen mal dadas, ser funcionario sexa un estigma. Que case haxa que pedir perdón por selo.
Sinto non ter podido contribuír ao desenvolvemento da nosa economía empaquetando produtos financeiros lixo que arruinaron millóns de familias. Sento non traballar para algunha das tres grandes empresas de cualificación que outorgaban a súa máxima nota a eses produtos lixo e agora se atreven -sen o menor rubor- a cualificar as emisións de débeda de España como un produto con dúbidas. Eles si que contribuíron ao benestar.
Sinto non ser un especulador bolsista que pode alterar a cotización dun valor para facer caixa con rendibilidades escandalosas mentres envía ao desemprego miles de persoas. Grazas a eles, a economía foi un casino onde sempre perden estes.
Sinceramente, sinto moito ter contribuído a que a crise sexa o que é pola miña condición de funcionario. A que os hospitais funcionen, a que haxa policía nas rúas, bombeiros nos incendios, mestres nas escolas públicas...
Pero xa conseguimos encarrilar a solución á crise. Xa reducimos o soldo a eses funcionarios parasitos que viven do conto, xa conxelamos as pensións dos que cotizaron toda a súa vida para ter unha vellez digna.
E, sobre todo, séntoo porque todo isto -tarde e mal- o fixemos ao ditado dese ente chamado mercados financeiros, que son os que provocaron toda esta desorde.
Efectivamente, síntoo.
Sempre me sorprendeu que un Estado aconfesional como é España achegue unha cantidade impresionante de diñeiro á Igrexa, á parte do que recada para o clero a través do IRPF (a cruceciña na declaración da renda).
En concreto, segundo a disposición da Lei de Presupostos do Estado para 2010 aparecida no BOE de decembro 2009: "Durante o ano 2010 o Estado entregará, mensualmente, á Igrexa católica 13.266.216,12 euros".
Por suposto, esta cifra iríanos moi ben agora para axudar a diminuír o déficit público. Pero, aceptando -que remedio- que os cidadáns teñamos que seguir mantendo o clero, gustaríame saber se estas retribucións se verán afectadas por unha rebaixa como a dos pensionistas, funcionarios e nais, que a sufrirán de inmediato.
CUT da UDC . SEMPRE DO LADO DAS TRABALLADORAS E TRABALLADORES
Quen somos | Contacto | Axuda
cutudc.com, 2009. Publicado baixo licencia Creative Commons DHTML Menu By Milonic JavaScript