Estamos a metade de curso e varias prazas de docentes seguen sen cubrir o que provoca que moitas materias estean aínda sen impartir. A isto hai que sumarlle un cambio de horario lectivo que trastoca por completo a actividade dos alumnos (coincidencias de dúas materias na mesma hora, por exemplo) .
 
Un horario, por outra banda, que xa quedara establecido en maio do ano pasado: “Que era o que nos correspondía. E en todo caso non consultaron con nós a decisión dese cambio”, nos conta Noelia Rey Fajín, vogal do movemento Asemblea Maxisterio. Esta mesma problemática acontece na facultade filosofía, polo tanto, o que ía ser un encerro unilateral da Facultade de Maxisterio acabou converténdose, nunha convocatoria de case 300 universitarios, coa unión dos alumnos de filosofía.
 
Como adiantábamos, esta rápida difusión deuse grazas a viralización da convocatoria a través das redes sociais, onde non cesan os apoios, as demandas e as solicitudes dunha solución aos órganos de goberno da Universidade de Santiago. E así ata que os profesores cheguen. Mentres, os futuros filósofos e educadores matan o tempo con diversas actividades culturais coma sesión de cine ou concertos. Ocupan as aulas como lugares de discusión de cara a vindeira acción e os ximnasios como habitacións improvisadas para durmir. Nos baños hai cepillos dos dentes coma na casa e os recunchos da facultade convértense en “bulebule” para facer do peche, algo levadeiro.
 
COMUNICAMPUS