Uns 3.000 estudantes das universidades catalás protestaron diante da Generalitat de Catalunya e na capital do estado concentráronse ao redor de 200 mozos e mozas fronte ao Ministerio de Sanidade xa que as autoridades non lles permitiron protestar ante o Ministerio de Educación.
 
En Barcelona os universitarios iniciaron a súa marcha, organizada por diferentes sindicatos estudantís, ás 12 h. en Praza Universidade ata finalizar o percorrido na Praza Sant Jaume preto das 15 h. Á folga sumáronse a Universidade de Barcelona, a Autònoma de Barcelona, a Universitat de Xirona e algúns campus da Universitat Pompeu Fabra e a Universitat Rovira i Virgili; entre outras moitas institucións educativas do resto de Catalunya e Valencia.
 
Unha das principais peticións dos estudantes cataláns foi a derrogación da lei Lomce, tamén coñecida como ‘lei Wert’. Esta reforma, moi polémica en terras catalás, establece que, en caso dun sistema de inmersión lingüística como o que hai en Catalunya (coa lingua cooficial como única vehicular), hai que ofrecer tamén a escolarización en castelán, se é necesario, pagando un colexio privado (neste caso, o ministerio adiantaría o diñeiro e despois llo detraería á Generalitat).
 
Polas rúas do centro de Barcelona os estudantes marchaban pacíficamente entre berros de Non “ao 3+2” ou “Non á privatización”, acompañados de máis de 10 patrullas e un helicóptero da Policía. Fronte á Generalitat de Catalunya, onde acabou a marcha, os portavoces dos sindicatos estudantís leron un manifesto no que se declararon “en pé de guerra contra o 3+2” porque “pon a institución educativa ao servizo do mercado e non da cidadanía”.
 
Parecidas foron as reivindicacións dos madrileños. “Baleirar as aulas para despois enchelas de estudantes organizados” foi o obxectivo da concentración convocada polo Frente de Estudiantes que naceu o pasado decembro como alternativa ao Sindicato de Estudantes, ao que denominan “sindicato de farsantes” por non defender os intereses reais dos estudantes de hoxe en día.
 
Denuncian desde a Fronte que “a privatización, a mercantilización e elitización” da educación faise notar en todos os niveis educativos, pero que “sen dúbida, onde máis o estamos sufrindo é na universidade”, facendo referencia á reforma universitaria coñecida como ‘3+2’ que segundo eles, prexudica aos estudantes de menor poder adquisitivo.
 
Candela Otero, unha das portavoces do colectivo explica que con esta reforma “xeneralízanse cada vez máis as materias do grao, polo que é máis necesario o mestrado para conseguir esa especialización que nos pide o mercado laboral”. Lembra ademais que o mestrado é privado e que ao aumentar o curso dun a dous anos, “obrígannos a pagar nalgúns casos ata 11.000 euros, e é algo inasumible para os mozos da clase obreira”.
 
Segundo ela, as autoridades educativas xustifican esta medida como “unha maior especialización e unha mellor adaptación a Europa”. Con todo, defende que o que os estudantes comprobaron é que “só serve para dividir entre unha educación de xente con diñeiro e outra para xente con menos recursos”, xa que os créditos do mestrado “custan o dobre que os de grao”, sinala.
 
Unha crítica xeral á reforma é que “obriga a facer un máster de 2 anos” e negociouse “sen escoitar aos estudantes”. No caso dos cataláns, tamén pediron ao presidente Carles Puigdemont que “paralice esta reforma” e que escoite á comunidade estudantil. Ramon Font, portavoz nacional do sindicato USTEC, valorou a protesta como “moi positiva” porque “presiona ao Goberno catalán para aplicar a ILP de educación aprobada no Parlament e que contempla a gratuidade da educación pública”.
 
A concentración en Madrid terminou de maneira pacífica e sen incidentes ao redor das 18.30 h. cando un dos membros da Frente de Estudiantes lembraba que son máis de 45.000 estudantes que xa tiveron que abandonar os seus estudos universitarios por falta de bolsas e polo aumento das taxas e chamaba a unha maior concienciación entre os seus compañeiros e compañeiras para “continuar a loita obreira de estudantes, e avanzar e construír o movemento estudantil”.
 
LibreRed