A finais de outubro tocoulles a nove independentistas galegos pasar pola audiencia herdeira do infausto “Tribunal de Orden Público” (encargado de xulgar os delitos políticos durante o franquismo), así como ver a súa organización política, “Causa Galiza”, ilegalizada do xeito máis totalitario e inxustificado posible. Pero poucos días antes eran cinco anarquistas madrileños, un dos cales aínda se atopa encarcerado, os que desfilaban esposados polos telexornais no medio de ridículos rexistros policiais nos que utilizaban suadeiras con mensaxes vexetarianos e bolsas con parafusos como probas irrefutables de pertenza a banda armada. Este operativo policíaco é o quinto realizado nos últimos tempos contra a contorna anarquista, desarticulando supostas organizacións terroristas das que ninguén xamais oíu falar e obrigando a pasar pola Audiencia Nacional a máis de cincuenta libertarios, estando a día de hoxe cinco deles aínda tras as reixas.
 
A ninguén lle pasaron inadvertidas tampouco as sucesivas redadas que baixo o rimbombante cualificativo de “Operación Araña” levaron á Audiencia Nacional a un feixe de persoas , sen apenas implicación política algunha, por verter mensaxes nas redes sociais contrarios á policía, partidarios da loita armada ou, simplemente, pouco afectos ao réxime e ás súas institucións.
 
Por outra banda a represión de “guante branco”, ou “burorrepresión”, leva tempo cebándose con tod@s aquel@s que protestan dalgún modo contra o sistema, a crise ou as súas nefastas consecuencias. Deste xeito un sen número de activistas foron multados durante os últimos tempos por saír á rúa para realizar calquera protesta que uns poucos anos antes non sería constitutiva de ningunha clase de sanción.
 
As novas lexislacións aprobadas recentemente (lei mordaza, reforma do código penal e lei anti-yihadista) teñen a clara intención de criminalizar a disidencia e aínda que nada de isto e novo como demostra os numerosos presos políticos que hai nas cadeas; agora a situación parece tender a agravarse como resultado do clima de histeria que os políticos e os “mass media” alentan desde os atentados de París. Toda a lexislación de excepción que agora enche as bocas de tertulianos e políticos, mentres axitan a pantasma do terrorismo yihadista, selará na práctica o cadaleito das liberdades civís e dos dereitos sociais.
 
Agora tocoulles aos anarquistas e aos independentistas ser xulgados polo tribunal da moderna inquisición política, canto tempo tardarán en ir a por ti?
 
CONTRA A SÚA REPRESIÓN
A NOSA REBELIÓN! "