NÚMERO 295 - 30/11/2015
CUTUDC / Novidades
INVESTIGACIÓN
España perdeu 12.500 investigadores en catro anos
España contaba ao peche de 2014 con 122.235 investigadores traballando a xornada completa, segundo os datos publicados este martes polo Instituto Nacional de Estatística (INE). Son 990 menos que en 2013 e 12.418 menos que en 2010, ano no que o sector da I+D tocou o seu máximo teito en persoal dedicado a estas actividades como en investimento.
-
Noticias relacionadas
A cifra é a máis baixa desde 2006, cando en España había 115.798 investigadores a tempo completo. Posteriormente o colectivo foi aumentando ata o ano 2010, para comezar unha progresiva caída.
O ano pasado un total de 200.232 persoas dedicáronse a actividades de I+D, en equivalencia a xornada completa, o que representou o 1,2% da poboación total ocupada, un descenso do 1,5% respecto ao ano anterior e tamén a cifra máis baixa desde 2006.
As mulleres representaron un 39,9% do persoal en I+D a tempo completo en 2014 (40,2% en 2013). As porcentaxes máis elevadas de participación feminina déronse nas institucións privadas sen fins de lucro (56,2%) e na Administración Pública (51,0%). No Ensino Superior esta porcentaxe situouse no 44,9%, mentres que no sector Empresas foi do 30,8%.
O investimento en I+D retrocede outro 1,5%
O investimento en investigación en desenvolvemento retrocedeu en total un 1,5% o ano pasado, ata os 12.821 millóns de euros, que representaron o 1,23% do PIB fronte ao 1,26% de 2013.
A cifra de 2014 é ademais a máis baixa desde o ano 2006 e supón a cuarta caída anual consecutiva, desde o teito de 14.588 millóns de 2010.
Por sectores de execución, o sector Empresas representou a maior porcentaxe sobre o gasto total en I+D, cun 52,9%, ata os 6.784 millóns (un 1,76% menos). Seguiulle o sector Ensino Superior, cun 28,1% do gasto total (3.606 millóns, que representa unha caída do 1,13%). Mentres, o gasto do sector Administración Pública supuxo o 18,8% do gasto total (2.409 millóns, un 1,14% menos).O 0,2% restante correspondeu ao sector Institucións Privadas Sen Fins de Lucro.
EB
CUT da UDC . SEMPRE DO LADO DAS TRABALLADORAS E TRABALLADORES
Quen somos | Contacto | Axuda
cutudc.com, 2009. Publicado baixo licencia Creative Commons DHTML Menu By Milonic JavaScript