A única boa noticia que deixa en Galicia o pacto do sector lácteo impulsado polo Ministerio de Agricultura no seu primeiro mes de vixencia é, polo momento, que os prezos soben. Os gandeiros recibiron 0,4 céntimos máis en novembro, mes no que tradicionalmente adoita subir a remuneración das granxas. Pero na comparativa co resto de territorios do Estado, as novas medidas deron menos froito en Galicia. De feito, aumenta a brecha con respecto ao resto de comunidades.
 
A subida de 0,4 céntimos é inferior á media estatal, que se situou en 0,5 céntimos, segundo os datos do Fondo Español de Garantía Agraria (FEGA). Galicia é xa a única autonomía na que os gandeiros cobran o leite por baixo dos 30 céntimos, xa que Cantabria, que era a segunda comunidade cos prezos máis baixos, tivo unha subida de case un céntimo ao pasar de 29,3 céntimos en setembro a 30,2 céntimos en outubro.
 
Así mesmo, a Comunidade galega segue lonxe dos prezos da autonomía peninsular cos datos máis elevados, que é Andalucía, pois a media en Galicia é de 28,7 céntimos o litro, 5,7 céntimos menos que os 34,4 céntimos que se pagan aos produtores andaluces.
 
http://www.economiadigital.es/gles/notices/2015/11/-ganaderos-gallegos-cobran-seis-centimos-por-la-leche-que-los-andaluces-70670.php

 Calendario de mobilizacións do sector lácteo
 
Dous meses despois de asinado o acordo lácteo, os prezos do leite no campo continúan sen subas. As cadeas de supermercados, sen embargo, si aumentaron o prezo das súas marcas brancas nos lineais, unha situación que o sector entende que require dunha explicación.
 
Durante a próxima semana, as organizacións que integran a Plataforma en Defensa do Sector Lácteo desenvolverán actos simbólicos de protesta ante áreas comerciais de Santiago, A Coruña, Ferrol, Pontevedra, Vigo e Lugo.
 
De non acadarse melloras nos próximos días, o sector anuncia tractoradas indefinidas en Santiago, ante a Xunta, e na Coruña, ante a delegación do Goberno.
 
Os actos previstos para a próxima semana pola Plataforma son os seguintes:

– Luns 30 de novembro. Santiago.
Comparecencia pública na Casa do Concello (12 horas), acompañados do alcalde de Santiago, Martiño Noriega; e reparto de de información no centro comercial As Cancelas (12.45 h.).
 
– Martes 1 de decembro. A Coruña.
Reparto de información ante o Alcampo (avenida Alfonso Molina), 12 horas.
 
– Mércores 2 de decembro. Lugo
Reparto de información no centro comercial As Termas (12 horas).
 
– Xoves, 3 de decembro. Pontevedra.
Rolda de prensa na Casa do Concello, xunto co alcalde, Miguel Anxo Fernández Lores (12 horas) e reparto de información ante o supermercado Dia (Santa Clara).
 
– Venres, 4 de decembro. Ferrol.
Reparto de información no polígono das Gándaras (12 horas).
 
– Sábado, 5 de decembro. Vigo
Reparto de información no centro comercial Gran Vía (12 horas).
 
http://www.campogalego.com/leite/calendario-de-mobilizacions-do-sector-lacteo/