Indicar que tamén a Fundación Irene Megias contra a meninxite, ten unha campaña de recollida de sinaturas coa fin de inclúan a vacina no calendario de vacinación en todo o territorio do estado (https://www.change.org/p/permitan-que-la-nueva-vacuna-contra-el-meningococo-b-sirva-para-erradicar-la-meningitis-en-espa%C3%B1a)
 
Seguro que moitos/as de vosoutros/as tedes fillos/as ou familiares ou amigos/as con persoas en idade de ser vacinados contra a meninxite B (recoméndase a vacinación de nenos/as maiores de 2 meses ata adolescentes).
 
Indicar que existen distintas familias de meningococos (A, B, C, W135, X e Y), as máis predominantes en Europa son a B e a C.
 
A vacinación fronte ao meningococo C está incluída nos calendarios de vacinación de todas as comunidades autónomas españolas e demostrou ser moi eficaz, e podemos dicir que a enfermidade por meningococo C na infancia en España practicamente desapareceu.
 
No ano 2013 autorízase, para o seu uso nos países da Unión Europea, a primeira vacina fronte ao serogrupo B, e desde agosto de 2014 está dispoñible en España só para uso hospitalario. A situación española é excepcional, xa que a Axencia Europea de Medicamentos (EMA) permite que se distribúa libremente nos países da Unión Europea para persoas a partir dos 2 meses de idade e, polo tanto, pódese adquirir en calquera farmacia comunitaria europea, fora de España.
 
Cales son os motivos polos que a vacina non se comercializa en España?
 
Os que nos gobernan fixéronnos crer que os motivos eran que non estaba aínda testada e non se sabía á súa efectividade e riscos que podía xerar.
 
Mentira. Unha parte importante do desenvolvemento clínico realizouse en España demostrando unha resposta inmune moi importante en todos os grupos de idade o que levou a súa aprobación de uso en Europa.
 
As reaccións asociadas á vacinación son leves. As máis habituais son a dor e avermellamento no lugar da inxección, febre e irritabilidade. Tamén é posible que provoque perda de apetito, vómitos e diarrea. Calquera das vacinas existentes no calendario en España teñen estas reaccións.
 
Os que nos gobernan tamén dixeron que a incidencia en España desta enfermidade é moi baixa.
 
Mentira. A incidencia desta enfermidade en España é unha das máis altas de Europa (0,7 por cada 100.000 persoas/ano).
 
Indicar ademais que a letalidade da enfermidade é aproximadamente do 10% e o risco de producir secuelas a longo prazo, fundamentalmente neurolóxicas e amputacións está entre o 20-30% dos casos.
 
No que vai de ano en Galicia (Arteixo) temos constancia de 2 persoas falecidas por esta enfermidade.
 
Os que nos gobernan tamén dixeron que os motivos eran que nun momento de crise non todo o mundo podería acceder á vacina polo seu elevado prezo e que a sanidade pública tampouco contaba cos recursos para subministrala de forma gratuíta.
 
Mentira. O prezo dunha dose da vacina é de 95,05 € comprada nunha farmacia de Portugal por un galego, seguro que se es portugués e con receita o prezo é distinto. Por exemplo a sanidade inglesa, que ten a vacina no seu calendario, negociou coa farmacéutica que a comercializa o prezo conseguíndoa a 28 € por dose. Seguro que o Ministerio de Sanidade Español pode obter un prezo similar o que non xeraría un custo elevado para poder ser dadas de forma gratuíta e incluíla no calendario de vacinas.
 
Do que si estamos seguros é que pola ineptitude irresponsabilidade dos nosos políticos, os nosos nenos/as están en risco de contraer unha meninxite tipo B para a que existe unha vacina, que a xente que menos recursos ten hoxe non pode acceder á vacina pois o seu custo en Portugal é bastante máis elevado que se se comercializada nas farmacias de España..