Poderiamos coller uns sacos, unhas esteiras e quedar, di algún dos corenta, case todos mozos, que se observan as caras, todas novas, en círculo. A Alba, Pablo e os demais non os une o seu amor polo cámping, senón unha situación vital similar, unhas expectativas parecidas de futuro e unha lectura política do que está a acontecer no seu país. “Chámano democracia e non o é", corean algúns dos corenta tras decidir que van quedar. Celebración de manifestación sen autorización, multa de ata 600 euros para os participantes e convocantes.
 
Ángel vive no barrio de La Viña. Esperanza, unha veciña de dúas rúas máis abaixo, con dous fillos menores de idade, leva tres anos no paro e non pode facer fronte ao pagamento da hipoteca que lle concedeu o Banco Santander. É amiga da familia de Anxo de toda a vida e esta mesma mañá van desafiuzala. A Plataforma de Afectados pola Hipoteca de Cádiz organízase para evitar o desafiuzamento. Anxo e outras 20 persoas citáronse no portal da casa de Esperanza para sentarse e, de forma pacífica, impedir o paso da policía. Obstruír a calquera autoridade no exercicio das súas funcións, multa de ata 30.000 euros.
 
Abdoulaye chegou á fronteira de Ceuta. Despois de varios meses de viaxe dende Senegal, consegue tocar territorio español. A lexislación internacional de Dereitos Humanos impide as devolucións en quente, pero a Garda Civil, tras golpealo, como recollen as cámaras, expúlsao ao outro lado da fronteira con Marrocos. A Lei de Seguridade Cidadá regula as devolucións 'en quente' dos inmigrantes que sexan detectados cando intenten entrar en Ceuta e Melilla irregularmente. A pesar da lexislación sobre DDHH, ningún Garda Civil poderá ser imputado, como pasaba ata agora.
 
Virxinia, Hernán, Sonia e Nacho son membros de Greenpeace e participan nunha protesta pacífica en defensa do medio. Descólganse da parede da central nuclear de Cofrentes, situada dende 1984 xunto ao río Júcar, na provincia de Valencia. Realizan unha pintada: "Perigo Nuclear". Ao baixar, espéraos a Garda Civil, que, como noutras accións parecidas, procede á súa detención. Esta vez, cando o seu caso chegue a xuízo non pasará como en accións anteriores nas que, tras demostrarse que non se produciron danos nin houbo violencia, quedan libres de delito. Reunións ou manifestacións non comunicadas ou prohibidas en lugares que teñan a consideración de infraestruturas críticas como centrais nucleares, multa de ata 600.000 euros.
 
Nunha manifestación en Madrid, policías sen a identificación visible ordenan a un foto xornalista identificarse mediante o seu DNI. O xornalista, gravando a escena, pídelle ao mando policial coñecer o seu número de placa antes de ensinar o seu documento de identidade. Nese momento, un dos policías que o rodean golpéalle a cámara que cae ao chan e posteriormente o brazo, antes de levarllo detido. A escena é, á súa vez, gravada por un manifestante con teléfono móbil, que rapidamente difunde o que pasou por redes sociais. Negativa a identificarse, multa de ata 30.000 euros. Falta de respecto á autoridade, multa de ata 600 euros. Uso non autorizado de imaxes de membros das Forzas e Corpos de Seguridade do Estado, multas de ata 30.000 euros.
 
La Marea