Como se recordará, a propia Haddi mantívose en folga de fame durante 34 días, fronte ao consulado de Marrocos en Las Palmas de G.C., para reclamar o corpo do seu fillo falecido, Lamin Haidala, e o axuizamento dos responsables da súa morte.
 
Despois de que tivese que ser hospitalizada, con abundantes vómitos con sangue e nun estado de saúde moi grave, o colectivo saharauí decidiu continuar a protesta cunha folga de fame en cadea -24 horas cada persoa-, "para darlle o relevo e que as súas reivindicacións se manteñan no tempo, segundo informaron fontes próximas á saharauí nun comunicado,".

O martes, sumábase a esta iniciativa o atleta saharauí Salah Amaidan, residente en Navarra.
 
Amaidan é un corredor saharauí moi recoñecido en toda Europa, a pesar de non poder participar en ningunha competición oficial dende que en 2004, durante unha carreira en Francia na participaba no equipo marroquí, alzou a bandeira saharauí sobre a súa cabeza durante os últimos cen metros da carreira. Antes fora triplo campión de cross-country para Marrocos e dúas veces campión do mundo árabe.
 
Tras a súa acción de 2004, pediu asilo político en Francia ante o risco de ser encarcerado á súa volta ao Sahara Occidental.
 
Dende entón estivo a competir cun equipo francés nas competicións organizadas polas Federación francesa e como atleta saharauí en competicións internacionais non oficiais. En 2013 estreouse unha película chamada The Runner sobre a súa historia, dirixida polo realizador palestino Saeed Taji Farouky.
 
Este mesmo mércores, a Takbar Haddi viaxará a Xenebra, onde expoñerá o seu caso ante o Comité de Dereitos Humanos de Nacións Unidas; permanecendo na capital Suíza ata o próximo día 1 de Xullo.
 
 
VIDEO