19/04/2010
CUTUDC / Novidades
ACTUALIDADE
A erradicación dos transxénicos centrou o Día Internacional da Loita Labrega
O Sindicato Labrego Galego e a Plataforma Galega Antitransxénicos participaron, o día 17, nunha manifestación en Madrid
O sábado conmemorouse o Día internacional da Loita Labrega. As organizacións que forman parte da Coordinadora Europea da Vía Campesiña organizaron accións e manifestacións para lembrar esta data a nivel mundial.
A Vía Campesiña dedica este ano a súa campaña á loita contra as empresas multinacionais e o control que exercen sobre os sistemas agrícolas e alimentarios en todo o mundo. Entre as actividades que se desenvolveron este 17 de abril, o Sindicato Labrego Galego e a Plataforma Galega Antitransxénicos acodiron a unha manifestación en Madrid co lema "Por unha alimentación e unha agricultura libre de OXM".
A secretaria xeral do SLG, Carme Freire, e un labrego da COAG foron as persoas encargadas de darlle lectura ao manifesto co que rematou a mobilización convocada pola Plataforma Rural e Greenpeace no Estado Español.
En Francia convocouse unha merenda campesiña, seguida de debates sobre as loitas contra as grandes superficies e distribuidoras. En Suíza fíxose un chamamento a "dicir non ao negocio agrícola e ao control das grandes distribuidoras na industria alimentaria", con proxeccións de filmes, mesas redodas e debates. Mentres, en Turquía, unha gran manifestación campesiña protestará contra as transformacións lexislativas neoliberais. En Roma organízase unha conferencia de prensa sobre a soberanía alimentaria e os OXM e mais un proxecto de comercialización de azucre ecolóxico e xusto producido por unha cooperativa brasileira. Estas e outras actividades e manifestacións tiveron lugar este sábado en distintos puntos de Europa.
O Día da Loita Labrega lembra cando, o 17 de abril de 1996, 19 campesiños sen terra do Brasil que defendían o seu dereito a produciren alimentos a través da demanda de acceso á terra foron masacrados pola policía militar en Eldorado dos Carajás. Dende aquela, cada ano, nesta data, organizacións de labregas e labregos, comunidades, grupos de estudantes, activistas e ONG de todo o mundo organizan actividades para exixir a soberanía alimentaria e o dereito dos labregos a alimentar as súas comunidades.
CUT da UDC . SEMPRE DO LADO DAS TRABALLADORAS E TRABALLADORES
Quen somos | Contacto | Axuda
cutudc.com, 2009. Publicado baixo licencia Creative Commons DHTML Menu By Milonic JavaScript