A porcentaxe de que habitualmente falan máis castelán que galego subiu 3,8 puntos, ata acadar o 22,5 por cento e o de que falan sempre en castelán subiu cinco décimas, ata o 20,1 por cento. Por provincias, Lugo e Ourense son as que presentan unha maior porcentaxe de poboación que sempre fala en galego, cun 40,3 por cento e un 41,9 por cento, respectivamente.

As áreas xeográficas con máis falantes de galego son a Costa da Morte e o sur de Ourense e as que menos as áreas de Vigo, A Coruña e Pontevedra. De feito, nas sete grades cidades o uso do galego está por debaixo da media, acadando Santiago os mellores datos.

O uso do galego é desigual dependendo da idade da poboación. Deste xeito, o 52,9 por cento dos galegos de máis de 65 anos fala habitualmente só en galego e un 25,6 por cento utiliza máis galego que castelán. En cambio, entre os rapaces de 5 a 14 anos, o 63,9 por cento fala habitualmente sempre en castelán ou máis en castelán que en galego.

No referente ás persoas que tomaron a decisión de cambiar a súa lingua habitual do castelán ao galego, unhas 47.000, a maioría delas fíxoo por unha decisión persoal, 51,5 por cento, seguida de motivos laborais, 28 por cento. O paso contrario dérono 67.856 persoas, case un 34 por cento delas por decisión persoal e case un 27 por cento por cento por razóns de traballo.

En 2008, o 66 por cento dos galegos de máis de 5 anos entendían moito o galego falado, fronte ao 5,2 por cento que o entende pouco ou nada. Con respecto ao 2003, a porcentaxe de persoas con alta comprensión do galego caeu en 15,1 puntos.

Doutra banda, o 54,1 por cento da poboación sabe falar galego cun gran nivel de corrección, case 14 puntos menos que en 2003, fronte ao 35 por cento que o sabe falar bastante e o 10,9 restante que é capaz de falalo pouco ou nada.

Ademais, o 45 por cento dos mozos de entre 5 e 14 anos saben falar moito galego, o 38,6 por cento bastante e o 16,4 por cento pouco ou nada.

A familia é o medio máis utilizado para aprender galego, concretamente polo 83,2 por cento da poboación. A porcentaxe aumenta a máis do 95 por cento se falamos de persoas maiores de 65 anos. En cambio, no colectivo que vai dos 5 aos 29 anos o medio máis habitual de aprendizaxe é a escola.En canto aos ámbitos de uso, o 49 por cento dos pais falan sempre en galego aos seus fillos, fronte ao 29 por cento que o fan só en castelán.

En cambio, no ámbito laboral, un 36,8 por cento dos traballadores galegos falan sempre neste idioma cos seus compañeiros de traballo, o 31,5 por cento con persoal ao seu cargo, 31 por cento cos seus superiores e o 28,3 por cento restante cos clientes.