Que pase isto desgraciadamente xa non é novo nin nos causa sorpresa algunha, por iso o estado de ánimo xeneralizado do persoal desta Universidade é a resignación. A traxectoria desta Xunta dá Patronal evidencia a súa conduta dócil e disciplinada ante os desexos da Todopoderosa Xerencia en Funcións, Superlativa Rexedora do noso Destino Laboral, Posuidora da Verdade Absoluta e Deusa da Decisións Perfectas, entre outros atributos.

Cando a Omnipotente Xerencia en Funcións lanza unha proposta, o seu fiel Xunta da Patronal amplía e endurece as condicións para que a súa obediencia non sexa posta en dúbida e, dese xeito, fortalecer os lazos que os unen. Se por exemplo, a Deusa-Xerenta propón non incluír á chusma interina nas axudas para cursos de formación, o seu corte engade: e que os pinten de amarelo, non vaia ser que se coe algún sen que nos deamos de conta, logo a isto chámano negociar e amence unha mañá máis. É o que se coñece como ser máis xerencialistas que a xerenta.

Para que a Xerencia en Funcións saiba das nosas reivindicacións, teremos que dirixirnos directamente a ela, pola contra tememos que non vexa desde a súa torre de marfil o que está pasando e tome as súas decisións baseándose na única información que lle chega, a do seu séquito de vasallos e aduladores. Pero a Xerencia en Funcións non contestará ás nosas solicitudes, nunca o fai, teremos que interpretar o seu silencio e esta é a clave de todo: interpretar.

Agora son consciente de que a proposta de convocatoria é perfecta e axústase con precisión á Lei que pide procurar especialmente que as materias esixidas se correspóndan co desenvolvemento posterior das tarefas a desenvolver. Non hai criterios para o exame de informática porque es ti mesmo o que ten que saber interpretar en que consiste o exame, do mesmo xeito que cando traballas na UDC a túa tarefa consistirá en saber interpretar a escasa e ambigua normativa desta Universidade e os silencios dos que a crearon. Ninguén che vai a ensinar a facer o traballo, porque a UDC necesita funcionarios intrépidos que saiban valorar en cada momento o que teñen que facer tomando as decisións oportunas.

Se, por exemplo, non tes suficientes persoas na lista de agarda de auxiliares administrativos e o que di o regulamento ao efecto non che convence nese momento, pois vas e sácaste da manga unha lista nova e andando, que non pasa nada. Que pasados uns meses vólveseche a ocorrer o mesmo cos auxiliares de biblioteca e esta vez non queres forzar, pois respectas o regulamento que para iso está. Que acaban as comisións de servizo e non queres trastornar os servizos cambiando de sitio á xente, invéntaste un mini-concurso e aire. Vólveche a pasar o mesmo dous anos despois pero esta vez só afecta a catro gatos, cumpres a lei tan ancho. Que prometes facer a convocatoria da oposición no primeiro trimestre do ano e ata asinas un compromiso ao efecto e non o fas, tranquilo a xente ten que entender que non sempre saen as cousas como un pensa (e a estas alturas a xente desta UniversidadE isto xa o ten totalmente interiorizado).

O mesmo ocorre con Open Office, por que está na convocatoria se o que ten instalado a Universidade é Microsoft? Porque, amigo meu, a Universidade estate probando unha vez máis para ver se tes os arrestos suficientes de sobreporte á tentación de seguir enriquecendo a Microsoft e instalas ti mesmo Open Office, que ninguén cho prohibe e para iso examináronche.

Así que quitádevos a vénda dos ollos, non deixedes que vos manipulen, arrepentídevos e deixade as vosas queixas, solicitudes e propostas que o que pide a Universidade axústase estritamente á Lei. Aqueles que saiban interpretar en que vai consistir e como van puntuar o exame de informática serán os elixidos. Esquecédevos do primeiro exame, só é un cebo para facer caixa e eliminar aos máis débiles. De que serviron as notas do primeiro e do segundo exame na anterior oposición? De nada, a nota que serviu foi a de informática, podías facer un pleno no test e outro no suposto práctico que se non estabas preparado para interpretar o exame de informática non che valeu de nada. E era tan fácil, se tivésemos un mínimo de cabeciña non estariamos como estamos. Se naquela oposición a túa decisión foi facer a parte de Calc e fixéchela perfecta, o suspenso que che puxeron un mes despois, cando comunicaron que esta parte do exame valórase cun 40% e Writter con 60%, estaba totalmente xustificado e é que só para un 0,0000083 dos traballos desta UnversidadE se necesíta este programa e, repito, a UniversidadE dá Coruña examínate do que vas traballar.

Oín por aí que algúns suxiren facer o exame de informática como o fan as demais administracións, en concreto facelo como na UniversidadE de Santiago ou na UniversidadE de Vigo. Pobres inxenuos. Que imos aprender nós da arruinada e vetusta USC se son eles os que nos toman como referencia e nomean, seguindo o noso exemplo, unha Xerenta en Funcións. Que imos aprender da UniversidadE de Vigo sen son tan inútiles que para gobernar a súa UniversidadE necesitan dun Xerente como a LOU manda e cinco Vicexerentes.

Olvidádevos tamén dá fase de concurso, na anterior oposición non sirveu para nada, so para coller unha ou outra praza, do cal moitos se arrepentiron co tempo pois como a Xerencia lles dixo (de palabra claro, non por escrito) que se ían a conceder permutas e, a maiores, íase a aplicar o convenio de mobilidade, elixiron as prazas que acordaron cos que ían a permutar (o que é totalmente lícito porque ti aplicas os criterios que che peta á hora de elixir unha praza e é tan válido este coma o elixir praza tendo en conta de se está máis ou menos cerca dá túa casa) e logo tiveron que quedar nelas pois nin se concederon permutas nin o convenio funciona ao ritmo que prometeran".

En definitiva, esta é a convocatoria perfecta que se materializará en probas perfectas e dará lugar ao nomeamento de funcionarios perfectos.

Mentres tanto, no centro da península ibérica un vello senador pensa sentado no seu escano, outros virán que bo te farán? e sorrí, se descojona, pártese o cu.