05/04/2010
CUTUDC / Novidades
ACTUALIDADE
Peche de filas dos grupos do Concello de Santiago coa USC
Os tres grupos do Concello compostelán únense nunha
declaración contra o pacto da docencia clínica e "calquera
iniciativa orientada á división ou segregación" de Medicina.
O mes pasado foron
os alumnos, fai algúns días os seis candidatos a reitor e
a semana pasada tocoulle á corporación municipal.
Socialistas, nacionalistas e populares puxéronse
de acordo para manifestar cunha única voz a súa
oposición a "calquera iniciativa orientada á
división ou segregación da titulación de
Medicina". Fixérono nunha declaración
institucional que responde "ás dúbidas e
interpretacións" xurdidas polo acordo asinado o 26
de febreiro entre os reitores das tres
universidades galegas e a Xunta e que "aconsellan
pechar filas por parte de toda a cidade coa USC",
subliña.
O
pacto que levanta as suspicacias refírese á
docencia clínica nos hospitais e outorga a
dependencia administrativa dos médicos que se
impliquen na formación do alumnado de Medicina da
USC á universidade máis próxima ó seu centro de
traballo, de modo que os do Chuac dependerán da
Universidade da Coruña (UDC) e os do Chuvi, da de
Vigo. Este cambio, advertiu a propia facultade, é
"inaplicable" e coloca o profesorado e o alumnado
"nunha situación de inseguridade administrativa,
académica e xurídica".
Dentro e fóra da Universidade de Santiago de
Compostela, interprétase como unha cesión ante a
presión localista coruñesa para conseguir o segundo
ciclo de Medicina, coa complicidade da Consellería
de Sanidade, a xestora dos hospitais, dirixida
pola ex concelleira popular herculina Pilar Farjas.
A
corporación advirte tamén que expor a división do
ensino da medicina nun momento de crise económica "só
contribuirá a empobrecer un sistema que vén
demostrando dende hai séculos unha probada
eficacia e solvencia tanto nos apartados da
investigación como da docencia". "Un dos piares do
prestixio da USC é o ensino da medicina, que cunha
hipotética división ou segregación, ademais de
supor un aumento do gasto, produciría unha
diminución da eficacia e da calidade", engade.
Precedente na Coruña
En
2007, o tres grupos do concello da Coruña
solicitáronlle á Xunta que os médicos do entón
aínda Juan Canalejo implicados na docencia clínica
de Medicina dependesen da Universidade da Coruña.
Renuncias históricas
A
resolución do pleno da corporación municipal sobre
Medicina fai tamén memoria e bota a vista atrás
vinte anos para engadir argumentos en defensa de
que a facultade compostelá continúe sendo a única
de toda Galicia.
Segundo reza o documento, no momento da división da
USC nas actuais tres universidades, a institución
nai renunciou a outras titulacións para manter a
exclusividade nesta."A división ou a segregación
(de Medicina) do ámbito da USC suporía unha ruptura
dos principios do mapa de titulacións aceptados no
momento histórico da segregación dos colexios
universitarios para a creación das universidades da
Coruña e de Vigo, mediante o que a USC renunciou a
outras titulacións para manter en exclusiva a
docencia de Medicina", di a declaración.
Cada unha
das tres organizacións políticas maioritarias de Galiza
deberían, algún día, sentarse e falar claramente do país que
queren e, dentro del, entre outras cousas, da(s) universidade(s)
que queren construír.
Non nos
parece normal que as mesmos partidos políticos que nunha
localidade fan pronunciamentos nun sentido, noutra localidade e,
sempre en función do beneficio electoral, se pronuncien en
sentido contrario.
Circunstancias coma dos estudos de medicina, caixas de aforro…,
fan menos cribles as propostas dos “políticos” poñendo de
manifesto a nula idea de
país que, nalgún dos casos, representan.
CUT da UDC . SEMPRE DO LADO DAS TRABALLADORAS E TRABALLADORES
Quen somos | Contacto | Axuda
cutudc.com, 2009. Publicado baixo licencia Creative Commons DHTML Menu By Milonic JavaScript