Xuíces para a Democracia (JpD) cre que a reforma laboral que se consagra no Real Decreto Lei aprobado polo Consello de Ministros o pasado 3 de febreiro é "ofensiva, regresiva, reaccionaria e profundamente inxusta". A asociación  publicou este xoves na súa web un comunicado no que denuncia que con este cambio lexislativo o Goberno ataca "a esencia mesma do dereito do traballador, intentando despoxalo do carácter tuitivo e compensador do tradicional desequilibrio entre as partes da relación de traballo".
 
A publicación deste texto ten unha grande importancia e non só pola relevancia social de JpD, a terceira asociación da maxistratura, con 520 afiliados. Hai que recordar que ao final, a aplicación de todas as leis depende en gran parte dos xuíces, que son os que teñen que interpretar o aprobado polo poder lexislativo.
 
Ao longo do texto, JpD insiste en que a norma desequilibra as relacións laborais a favor dos empresarios. O comunicado mestura consideracións ideolóxicas como cando fala do "tradicional desequilibrio entre as partes da relación de traballo" con prognósticos de carácter económico, que resultan curiosos nunha asociación de maxistrados: "A reforma non servirá para crear emprego estable e non combaterá a dualidade do mercado de traballo".
 
Esta nova degradación da causalidade no despedimento (...) é contraria ao dereito constitucional ao traballo que consagra o art.35 da Constitución que, como recordou o Tribunal Constitucional, integra o dereito a non ser despedido sen causa xusta.
 
Os xuíces tamen fan esta reflexión:
 
A nosa obriga como xuíces garantes dos dereitos fundamentais dos traballadores é continuar aplicando as leis laborais conforme aos principios e valores constitucionais, poñendo freo aos posibles abusos que tan amplas posibilidades de disposición do contrato de traballo outorgan ao empresario.