A pensión media en Galicia subiu un 3,3% en Galicia en xaneiro con respecto a un ano antes, se ben continúa sendo a máis baixa do Estado ao situarse en 690,12 euros, segundo datos do Instituto Nacional da Seguridade Social (INSS) do Ministerio de Emprego e Seguridade Social.
 
O número de pensións en Galicia situouse en 731.215 en xaneiro, un 0,9% máis que o mesmo mes de 2011.
 
Do total, 450.774 foron de xubilación, cunha pensión media de 771,85 euros; 184.732 de viuvez, con 503,73 euros; 69.788 de incapacidade permanente, con 770,09; 20.233 de orfandade, con 363,76; e 5.688 en favor de familiares, con 446,13 euros de pensión media.
 
No conxunto do Estado, o número de pensións contributivas da Seguridade Social alcanzou a cifra de 8.871.435, un 1,4% máis en taxa interanual.
 
A nómina mensual superou o pasado 1 de xaneiro os 7.299 millóns de euros (7.299.620), un 4,6% máis que no mesmo mes de 2011.

Máis da metade das pensións fórono por xubilación, 5.296.851; 2.319.896 por viuvez; 941.490 por incapacidade permanente; 275.077 por orfandade e 38.121 a favor de familiares.
 
A pensión media de xubilación alcanzou a contía de 936,43 euros, un 3,4% máis con respecto ao mesmo mes do pasado ano.
 
En canto á pensión media, que comprende as distintas clases de pensión (xubilación, incapacidade permanente, viuvez, orfandade e a favor de familiares), esta foi de 822,82 euros ao mes, un 3,1% máis sobre un ano antes.