Segundo as cifras sinaladas na enquisa o paro en Galicia medra a un ritmo do dobre que no resto do estado.
 
A pesar dos acordos no seu día subscritos cos sindicatos amigos e que ían destinados a loitar contra o paro (coma os recentemente asinados) que o  desemprego aumente en Galicia moito máis que no conxunto do Estado é unha mostra de que esa política fracasou. Tampouco na nosa nación a “baixada de pantalóns” dos sindicatos maioritarios axuda a que se creen empregos
 
O incremento alarmante do desemprego desde que Feijoo é presidente da Xunta contrasta co seu compromiso durante a campaña electoral polo que apalabraba  acabar co paro en 45 días. Iso si o incremento escandaloso de desempregados/as será a escusa, unha vez máis esgrimida polo seu colega Rajoy, para axilizar a reforma laboral e precarizar, aínda máis, as condicións laborais, económicas e sociais da clase obreira.
 
En Galicia, o paro creceu no último trimestre de 2011 un 6,1%, en relación ao trimestre anterior, o que supón un incremento de 13.800 persoas en situación de desemprego.
 
Deste modo, o aumento do paro en Galicia durante 2011 foi o cuarto máis acusado --tras os de La Rioja, Navarra e Extremadura--, pero a taxa de desemprego mantense máis de catro puntos por debaixo da marca estatal e é a sexta máis baixa (son máis reducidos as de Aragón, Cantabria, Castilla e León, Navarra e País Vasco).
 
Ademais, o número de ocupados situase en 1.072.900, o que supón a destrución de 20.200 empregos en 2011 (un 1,85% menos). Na comparación co trimestre anterior, 14.100 persoas deixaron de estar ocupadas, o que bota un descenso do 1,3%.
 
MÁIS PARO ENTRE MULLERES QUE ENTRE HOMES
 
A taxa de actividade en Galicia situouse ao peche de 2011 no 55,33% e foi maior entre os homes (un 61,48%) que entre as mulleres (un 49,72%). Así mesmo, o número de varóns ocupados situouse en 574.100 e o de parados en 122.600, co que a taxa de paro masculina rematou o ano no 17,6%.
 
En canto ás mulleres, o ano rematou o Galicia con 498.800 ocupadas e 117.700 paradas. Deste modo, a taxa de paro feminina subiu ata o 19,09% no último trimestre do ano.
 
No Estado español, o paro subiu en 577.000 persoas en 2011 respecto a 2010, un 12,3% máis, situándose o número total de desempregados en 5.273.600 persoas, cifra inédita ata agora para a economía española. A taxa de paro escalou ao peche do ano pasado ata o 22,85%, porcentaxe 2,5 puntos superior ao de 2010.
 
A taxa de paro alcanza así o seu nivel máis alto da serie histórica comparable, que arranca en 2001. Remontándose máis atrás, utilizando series non comparables, non se alcanzaba unha porcentaxe desta natureza dende o primeiro trimestre de 1995, cando a taxa de paro se chegou a situar no 23,49%. No primeiro trimestre de 1996, a taxa de paro rexistrou un nivel moi parecido á de agora (22,83%), aínda que era dúas centésimas inferior.
 
No conxunto do Estado, o paro subiu no cuarto trimestre de 2011 respecto ao mesmo período do ano anterior en 577.000 persoas, un 12,29 por cento, mentres que a taxa de paro ao peche do ano se situou no 22,85,
 
Ademais dos aumentos de La Rioja (19,38) e Navarra (19,06), o paro subiu tamén por enriba da media en Extremadura (18,94), Galicia (18,13), Castilla-La Mancha (16,27), Madrid (15,01), Baleares (13,95), Asturias (13,71) e Catalunya (12,91). Con menores porcentaxes situáronse Aragón (5,89), Murcia (6,66), Castilla-León (7,91) e Cantabria (8,44).
 
En termos absolutos, no cuarto trimestre de 2011 en relación ao mesmo período do ano anterior, o paro creceu máis en Andalucía 121.100 persoas, Catalunya (88.700), Madrid (81.300) e Comunidade Valenciana (65.400).
 
En canto á taxa de paro, a máis alta deuse en Andalucía (31,23) seguida de Canarias (30,93), Extremadura (28,59), ademais das cidades autónomas de Ceuta e Melilla con 29,16 e 28,13, respectivamente.
 
As taxas máis baixas de paro rexistráronse en Euskadi, con 12,61 e Navarra, con 13,82.
 
Respecto ao terceiro trimestre, o desemprego subiu en todas as autonomías e fíxoo en maior medida en Baleares (33,67), Extremadura (22,73), Navarra (17,38) e Cantabria (12,08), e o único saldo negativo neste período sería en Ceuta cun 1,22