Os reactores nucleares BWE/2-5, de auga en ebulición, como o da central burgalesa de Garoña, son susceptibles dun problema de fricción nas barras de control que influiría na seguridade en caso de terremoto, segundo explica nun informe General Electric, fabricante destes reactores.
 
O problema é que se produce unha interferencia ou fricción das barras de control coas canles de combustible canto estes van acometer as súas funcións principais: absorber os neutróns e parar a reacción nuclear, que podería agravarse en caso de terremoto, detalla General Electric.
 
O fallo foi notificado por Xeneral Electric ao consello de seguridade nuclear americano e ás empresas que operan as centrais con este tipo de deseño, entre elas a de Garoña, cuxa xestora, Nuclenor, confirma telo recibido en setembro.
 
A notificación de General Electric suscitou reaccións en EUA, onde organizacións como a Union of Concerned Scientists (UCS) o analizou para concluír que a «deficiencia» detectada podería desencadear unha situación preocupante de producirse un terremoto en circunstancias normais de funcionamento do reactor.
 
A UCS incide na súa análise en que, «se falla a inserción das barras de control», o asunto podería dar lugar «a unha situación na que non se podería parar unha central deste tipo en caso de emerxencia».
 
En España, non obstante, o problema non aparece mencionado nas probas de resistencia ás que o Consello de Seguridade Nuclear acaba de someter a Garoña, e aos outros sete reactores operativos, por mandato da Unión Europea tras o accidente xaponés de Fukushima.
 
Fontes de Nuclenor restan importancia á comunicación recibida e consideran que forma parte das notificacións «obrigatorias» que fan os fabricantes dos reactores «ante calquera anomalía que se detecte».
 
Dende Nuclenor insisten en que «o problema xa era coñecido pola industria e é seguido con normalidade dentro dos programas de vixilancia que se levan a cabo periodicamente na central».