O presidente do Goberno, Mariano Rajoy, asegurou que “En España farase algo parecido ao que se fixo en Portugal”, en alusión ás duras medidas de axuste aprobadas polo Executivo luso. "Imos ter que tomar decisións difíciles para lograr un crecemento sostido e estable", advertiu tras reunirse co primeiro ministro portugués.
 
Rajoy, en rolda de prensa conxunta co primeiro ministro portugués, Pedro Passos Coelho, recordou que o Goberno xa tomou medidas para reducir o déficit en 15.000 millóns e anunciou que o próximo venres se aprobará en Consello de Ministros a Lei de Estabilidade Presupostaria, "que afectará a todas as Administracións, que non poderán gastar o que non teñen".
 
Un plan "parecido ao de Portugal", un país intervido
 
"Estas decisións e algunhas máis, bastantes máis, que haberemos de abordar no futuro, son necesarios e imprescindibles en España e atreveríame a dicir que en Portugal", engadiu Rajoy, quen confirmou que nas próximas semanas se aprobará tamén a reforma laboral e a do sistema financeiro. O presidente chegou a anunciar "algo parecido" ao axuste portugués, un país que está intervido polo FMI e a UE. Cando estaba na oposición, Rajoy insistía en que a España de Zapateiro era un "protectorado" da UE sen marxe de manobra.
 
"As cousas están mal, non fai falta que o recorde o FMI"
 
Rajoy presentou as malas previsións do FMI para a economía española como "un estímulo para traballar con intensidade e con coraxe" e apuntou que "as cousas están mal, non fai falte que o recorde o FMI, aínda que pode facelo. Ademais, garantiu que o país cumprirá o obxectivo de déficit da UE, que "hoxe é o 4,4 por cento" despois de que o ministro de Facenda Cristóbal Montoro poña en dúbida nos últimos días a posibilidade de facelo.
 
Malas perspectivas e novos recortes
 
O Fondo Monetario Internacional vaticinou que este ano a economía española caerá un 1,7 por cento e prognostica que se pechará o exercicio cun déficit público do 6,8 por cento do PIB. Ademais, o Banco de España prevé que a taxa de paro se sitúe por enriba do 23%. Para Rajoy, as previsións son "sempre discutibles", e recordou que no seu primeiro axuste recortou 15.000 millóns de euros de gasto e que volverá a reducilo nos Presupostos Xerais do Estado para este ano, que se presentarán en marzo.
 
En definitiva duras medidas de axuste que afectarán negativamenten á clase traballadora e en favor dos bancos e a oligarquía tal e como fixo o executivo luso.