O articulado da iniciativa lexislativa critica as "actuais políticas de privatización" do sector sanitario galego, que, na súa opinión, "producen un contrastado empeoramento da calidade asistencial" e un "enorme aumento dos custos sanitarios".
 
En contraposición, as medidas que propón a ILP "teñen a finalidade común de achegar o servizo público á cidadanía e preservar o seu carácter público, universal e gratuíto".
 
Elemento básico
 
Neste sentido, a plataforma recorda que a sanidade pública "constitúe un elemento básico do Estado Social" e un "claro indicador de equidade e solidariedade". Por iso, criticaron a "campaña neoliberal de ataque e desmantelamento dos sistemas públicos de saúde" que, segundo os seus datos, se está a levar a cabo, con accións como "a redución do presuposto sanitario" ou o "recurso ao sector privado".
 
No articulado da ILP, SOS Sanidade Pública establece que a Xunta "manterá o carácter público da titularidade, financiamento, xestión e provisión dos servizos sanitarios e socio-sanitarios" da Comunidade, a través do Sergas.
 
Así mesmo, recóllese que o Sergas "promoverá de xeito prioritario, coa dotación necesaria de persoal e medios tecnolóxicos," a mellora da capacidade resolutiva dos servizos de Atención Primaria, "cunha cobertura equilibrada en todo o territorio galego e para toda a poboación".
 
Ademais, apóstase pola división do servizo nas áreas sanitarias, que contarán cos recursos sanitarios de Atención Primaria e Especializada.
 
Para a presentación desta iniciativa no Parlamento, esta deberá recibir primeiro o visto e prace da Mesa, tras o que se iniciará un período de catro meses para a recollida de firmas.