Xaneiro de 2012
 
 

23/01/2012

   CUTUDC / Novidades

  ACTUALIDADE
 

A crise dispara un 40% o número de galegos que se van ao estranxeiro

Galicia é a terceira comunidade, por detrás de Euskadi e Baleares, onde máis creceu a cifra de emigrantes respecto a 2010. Cada día fan as súas maletas 36 residentes na comunidade

 

  •  

    Cada día 36 residentes en Galicia fan as maletas para irse ao estranxeiro. A crise económica que arrastra o país dende 2008 e o retorno de inmigrantes aos seus países de orixe disparou o ano pasado as saídas da comunidade galega rumbo a outros países. Ata un 40,5% máis de viaxes ao exterior que os rexistrados en 2010. Segundo o balance de Estimacións da poboación actual do Instituto Nacional de Estatística (INE) divulgado onte, en 2011 cruzaron a fronteira dende Galicia un total de 13.323 cidadáns -6.985 españois e 3.677 estranxeiros-, o que a converte na terceira comunidade autónoma, por detrás de País Vasco (85%) e Baleares (71,3%), con maior éxodo.
     
    Malia este boom da emigración, Galicia mantén o seu saldo migratorio positivo. É dicir, son máis os cidadáns que o ano pasado estableceron a súa residencia na comunidade que os que abandonaron o país. Fronte aos 13.323 cidadáns que se foron de Galicia ao estranxeiro en 2011, retornaron un total de13.800, o que deixa un saldo positivo de 522. Unha tendencia non obstante á baixa respecto ao ano anterior na comunidade, xa que pechou 2010 cun saldo migratorio positivo de 4.321. Xunto a Galicia, outras dez comunidades atraeron o ano pasado a máis inmigrantes e retornados que emigrantes e estranxeiros fixeron as maletas en busca dun emprego no exterior ou nos seus propios países de orixe.
     
    Evolución
     
    Pola contra Cataluña, Comunidade de Madrid, País Vasco, Cantabria, La Rioja e Navarra concluíron 2011 con máis desprazamentos ao exterior que retornos. Estes movementos provocaron que España pechase por primeira vez o ano cun saldo migratorio negativo -un total de 50.090-, unha tendencia, que segundo advirte o INE se manterá ata polo menos 2020. Entre 2002 e 2006 os fluxos migratorios incrementaron a poboación española en máis de 600.000 persoas anualmente, suba que chegou a ser de 716.257 persoas en 2007 e que caeu a 443.930 en 2008. Non obstante, un ano despois o crecemento foi de 47.362 persoas e en 2010, de 62.156.
     
    A pesar de que o saldo migratorio do conxunto do país rexistrou unha taxa negativa por primeira vez, nalgunhas provincias como A Coruña, Lugo e Pontevedra xunto con Alicante, Las Palmas, Tenerife foron máis as persoas que decidiron instalarse que os que optaron por marchar. En Alicante por exemplo, a poboación creceu en 8.366 persoas, a de Las Palmas fíxoo en 5.456 e a de Tenerife en 5.035. No caso de Galicia, só en Ourense o número dos que se foron en busca dunha oportunidade de futuro supera aos que se asentaron na provincia (-287). Mentres, na Coruña, Lugo e Pontevedra o saldo migratorio foi positivo: 526, 102 e 180, respectivamente. Non obstante, se se compara a cifra dos emigrantes contabilizados o ano pasado na comunidade respecto a 2010, o balance é negativo, xa que ningunha provincia se salva da fuxida masiva pola crise: enA Coruña emigraron un total de 5.063 cidadáns, un 50% máis que o ano anterior; en Lugo un total de 1.503 residentes na provincia fóronse ao estranxeiro, o que supón un 24,4% máis; de Ourense, marcharon ao estranxeiro un total de 2.805, un 68% máis; e en Pontevedra, 3.958, un 2,3% máis.

    Prensa

     

CUT da UDC . SEMPRE DO LADO DAS TRABALLADORAS E TRABALLADORES

Quen somos | Contacto | Axuda

cutudc.com, 2009. Publicado baixo licencia Creative Commons DHTML Menu By Milonic JavaScript