23/01/2012
CUTUDC / Novidades
ACTUALIDADE
A crise pon en xaque o modelo económico da Coruña
A Coruña evidencia nos primeiros compases deste ano 2012, que se augura moi duro social e economicamente, un agravamento dos síntomas máis indesexables da crise.
-
As alarmas acendéronse sobre todo ao coñecerse que foi no pasado mes de decembro a provincia na que se destruíu máis emprego no Estado e que superou por primeira vez a barreira psicolóxica das cen mil persoas sen traballo.
O dato encerra ademais outra revelación preocupante: un de cada tres parados da provincia coruñesa, 34.106 de 101.652, pertencen a La Gran Coruña. Os nove concellos que conforman a área metropolitana, Abegondo, Arteixo, Bergondo, Cambre, Carral, A Coruña, Culleredo, Oleiros e Sada, sufriron o pasado mes o maior aumento do desemprego en todo o país, malia ser a locomotora económica da comunidade que dá traballo ao 30% dos galegos. O que é o epicentro da creación de riqueza en Galicia está a empezar a pagar o maior prezo da crise na comunidade, aínda que en número absoluto de desempregados a provincia coruñesa se encontre aínda lixeiramente por debaixo da pontevedresa, que rexistra un total de 102.960 parados.
O aumento do desemprego na Coruña é o detonante ademais doutra serie de indicadores sociais que asoman tamén con crueza. O número de familias que subsisten exclusivamente dun subsidio na cidade roza xa as 22.000 e a demanda de axuda en Cáritas e a Cociña Económica desbórdase. Os comedores sociais e outras organizacións benéficas rexistraron un importante aumento de pensionistas que acoden a estas institucións porque destinan o importe dos seus subsidios a sufragar as hipotecas e outras necesidades perentorias dos fillos que perderon o seu traballo. Os fogares coruñeses perderon unha media de ingresos de 1.200 euros durante o último ano e o risco de pobreza disparouse ao 11,51% ao longo de 2011, segundo o Instituto Galego de Estatística.
Un máis dos datos inquietantes neste global empeoramento coruñés é o derrubamento en 2011 do sector hoteleiro, que pechou o ano cunha caída de ocupación ata o 35% tras perder o 8% dos clientes a pesar de rebaixar os prezos preto dun 10%. O turismo, xunto co fenecido ladrillo e o pequeno comercio, foron os piares nos que se sustentou a economía coruñesa dende os anos
O alcalde coruñés, Carlos Negreira, aludiu na campaña das últimas eleccións municipais á necesidade de repensar o modelo económico da cidade. Este debate está nestes momentos tomando corpo no círculo de empresarios e economistas. Negreira puxo en marcha en novembro, para buscar solucións á crecente sangría de pasaxeiros no aeroporto de Alvedro, unha interesante ferramenta consultora na que deu voz a empresarios, comerciantes, hostaleiros e outras administracións como a Autoridade Portuaria. Esta comisión, que ten previsto reunirse cada mes, podería ser o xerme dunha máis ampla célula pensante na que se formule ese oportuno debate sobre a necesidade ou non de cambiar o modelo económico da cidade de A Coruña.
As expectativas de 2012 prevén un empeoramento da situación, pola repercusión negativa que os recortes drásticos no gasto público terán na actividade económica en xeral e na creación de emprego en particular. E o desemprego é, precisamente, o drama que sacode xa a décima parte da poboación coruñesa. Quizais sexa o momento de aproveitar a chamada de atención que botan as estatísticas da crise para coller o touro polos cornos e pilotar un cambio de rumbo que encarrile o futuro da Coruña.
CUT da UDC . SEMPRE DO LADO DAS TRABALLADORAS E TRABALLADORES
Quen somos | Contacto | Axuda
cutudc.com, 2009. Publicado baixo licencia Creative Commons DHTML Menu By Milonic JavaScript