Os portavoces de CIG Paulo Rubido, secretario nacional de CIG-Servizos, e Raimundo Méndez, secretario de comunicación, cultura e deporte da Federación de Servizos de UGT, informaron deste caso nunha conferencia de prensa conxunta. Na querela polo penal aceptada polo xulgado compostelán, están tamén imputados o anterior xerente da Fundación USC Deportiva, Carlos Feijóo Novoa, e a traballadora Rocío Bulmes Fraga.
 
A avogada Eva Vales, que os acompañou na comparecencia, explicou que polo primeiro dos delitos, a pena sería de 3 a 6 anos de prisión e de 6 a 10 de inhabilitación e, polo segundo, a mesma pena de prisión e inhabilitación de 7 a 10 anos.
 
O asunto iniciouse cos primeiros pasos para a realización de eleccións sindicais na Fundación universitaria, en outubro de 2009, para a súa celebración en febreiro de 2010. O mesmo día de presentación das candidaturas, a Universidade decidiu o despedimento da traballadora Pilar Díaz, candidata de UGT, que en primeira instancia obtivo unha sentenza de nulidade, aínda que o Tribunal Superior de Xustiza de Galicia considerouno improcedente, polo que foi indemnizada, aínda que levou o asunto ao Tribunal Supremo, onde agora se atopa.
 
Os sindicalistas denunciaron que a traballadora despedida foi substituída nun proceso que consideran irregular, por unha empregada eventual, monitora deportiva da piscina, que pasou a fixa, «a dedo», e que é a terceira imputada pola demanda penal que presentou a CIG.
 
UGT, pola súa banda, presentou tamén unha demanda contencioso-administrativa, polos defectos da convocatoria, en que se valoraron un 30% a experiencia, de igual xeito aos contratados parciais que a tempo completo, e un 20 por cento a entrevista, unhas desproporcións que consideran ilegais, polo que demandan a súa anulación.
 
Os representantes sindicais cren que o concurso foi organizado ad hoc para conceder a praza á persoa que finalmente a obtivo. A avogada non descartou na conferencia de prensa a posibilidade de que a querela se amplíe a outros delitos, como o de fraude ou o de suborno.
 
Rubido considerou que a Universidade non pode ter un reitor cunha imputación firme, polo que demandou a súa «inmediata dimisión» e a apertura dun concurso público transparente e a apertura dunha mesa de negociación para «racionalizar» a situación da Fundación USC Deportiva. Tamén Méndez rexeitou esta situación e considerou máis «inadmisible» aínda o despedimento dunha candidata sindical nun ente público que nunha empresa privada, e subliñou que o actual reitor era coñecedor destas irregularidades.
 
Antes do seu nomeamento
 
O reitor considera «incomprensible» a actitude de CIG e UGT ao implicalo nunha querela por feitos relacionados coa Fundación USC Deportiva, e argumenta que non interveu no proceso denunciado. Nun comunicado, o reitor sinala que non participou nestes feitos «nin a título persoal nin como reitor, xa que foron con anterioridade ao seu nomeamento como presidente do padroado da Fundación, o 30 de xullo de 2010».
 
Aínda que non se indica na denuncia, a nota do reitor sinala que «pode deducirse» que a acusación se dirixe contra el na súa condición de presidente do citado padroado, «cargo que asumiu despois dos feitos denunciados», reitera.
 
Tras recordar que a denuncia se dirixe contra tres persoas, resalta tamén que en «o relato dos feitos da querela non figura para nada» e «nin sequera  secíta ao reitor». Tamén sinala que a querela se atopa en fase de instrución, «polo que o xulgado non puido aínda oír ás partes, nin tomou unha decisión sobre a mesma».
 
Finalmente, Juan Casares anuncia que se reserva o exercicio de accións legais contra os querelantes, por entender que se trata dunha «denuncia falsa», así como as posibles accións civís polo dano ocasionado. Casares Long conclúe que non se pode manchar o nome das persoas e desprestixiar ás institucións de forma gratuíta, como fan os autores desta demanda».
 
Noticia recollida da prensa escrita