Coruña

Unha de cada tres parados da provincia da Coruña que estaba apuntado en decembro nas oficinas dos servizos públicos de emprego (antigo INEM) pertence á bisbarra da Coruña. A finais de ano había 101.651 parados na provincia coruñesa dos que 34.106 pertencían aos concellos de Abegondo, Arteixo, Bergondo, Cambre, Carral, A Coruña, Culleredo, Oleiros e Sada. O desemprego incrementouse nestes nove concellos nun 7,5% con respecto ao mes de decembro de 2010, ao pasar de 31.722 aos 34.106 parados.
 
Por enriba da media do 7,5% situáronse os concellos de Arteixo, Bergondo, Cambre, Carral, Culleredo e Oleiros, mentres que por debaixo só quedaron A Coruña, Abegondo e Sada. Bergondo liderou o crecemento do número de parados en decembro con respecto ao mesmo mes de 2010 nun 14,9% ao pasar de 463 a 532 desempregados.
 
O segundo concello onde máis creceu o paro no último ano foi en Cambre onde se incrementou nun 11,6% ao pasar de 1.856 a 2.072 desempregados. Completou o podio Culleredo onde o paro aumentou nun 9,7% (de 2.321 a 2.547). Tamén con incrementos que superaron o 9% se situaron Carral (9,4%) ao subir de 381 a 417 desempregados; Arteixo (9,3%), de 2.973 a 3.250, e Oleiros (9,2%), de 2.202 a 2.406.
 
Por debaixo da media da bisbarra coruñesa situáronse os concellos de Sada, onde o desemprego creceu un 6,3%, de 1.034 a 1.100 e A Coruña (6,3%) de 20.112 a 21.395. Pecha a clasificación o concello de Abegondo onde o incremento do paro no último ano foi do 1,8% ao pasar de 380 a 387 desempregados.
 
Por sectores, seis de cada dez parados coruñeses proceden do sector servizos (22.841), fronte aos 5.555 que expulsou a construción e os 4.887 que proveñen da industria. O sector primario é o que está a resistir con máis consistencia a crise, xa que só contribuíu con 538 parados á estatística, apenas un 1,5 % do total.
 
Ferrolterra, Eume e Ortegal pecharon o pasado ano con 18.521 parados, 1.038 máis que en decembro do 2011. Confírmase a tendencia iniciada desde o comezo da crise, que supuxo un incremento interanual de máis de mil demandantes e achega xa a zona aos 19.000 desocupados. Así, só nos últimos doce meses, o paro creceu nas tres comarcas case un 6%. Na desagregación por territorios, a variación interanual foi do 13,76% no Ortegal, un 6,09% en Ferrolterra, e un 1,77% no Eume.
 
De acordo cos datos divulgados onte pola Consellería de Traballo, en decembro do 2011 anotáronse nas oficinas do antigo Inem 158 persoas máis á procura dun traballo que as que había rexistradas en novembro. O comportamento do mercado de traballo foi peor en Ferrolterra, Eume e Ortegal que no conxunto do país, xa que na comarca o paro subiu no último mes unha 0,8% fronte ao 0,4% da media estatal.
 
Por sectores
 
Na análise por sectores, as cifras do gabinete de Beatriz Mato indican que o desemprego só baixou nos servizos e entre os que aínda non se estrearon no mercado laboral. Así, os servizos suman 9.960 demandantes dun posto de traballo, 136 menos que o mes anterior, o que supuxo un descenso do 1,3%. Esta conxuntura explícase polo desenvolvemento da campaña do Nadal, onde se produce habitualmente unha subida da contratación, principalmente no comercio. O colectivo de sen emprego anterior suma 2.502 parados, 22 menos que en novembro, cunha baixada do 0,8%.
 
Porcentualmente, o maior incremento do desemprego correspondeulle en decembro á industria, cun total de 2.675 demandantes, 146 máis e unha subida do 5,7%. A construción tamén continúa acusando a crise do ladrillo e a paralización da edificación e a obra pública, superando xa os 3.000 parados (en concreto 3.035), e 165 desocupados máis, o que implica un incremento do 5,6%.
 
O paro tamén creceu na agricultura e a pesca, con 349 demandantes, oito máis que en novembro e cun incremento do 2,3%. No entanto, segue sendo o sector con menos impacto do desemprego.
 
Os municipios, en detalle
 
Por municipios, só os de Ferrol, Cedeira, Cabanas, Pontedeume e Cariño rexistraron un descenso do desemprego, e foi Ares, con 69 novos parados, o concello cun maior aumento.
 
Por sexos, as mulleres continúan padecendo con máis intensidade a secuela do desemprego. Así, ao peche do ano había rexistradas 9.764 demandantes femininas, un 52,72% do total, fronte a 8.757 homes.