Peor en Galicia
 
En Galicia a situación derivada do paro é tráxica, por dúas razóns básicas. En primeiro lugar, porque, segundo os datos do SEPE, as prestacións do sistema de protección por desemprego deixan fóra a máis do 40 % dos parados rexistrados na comunidade. Dos 258.234 que había en decembro, só 80.332 (é dicir o 31,1 %) cobran un subsidio de carácter contributivo. Outros 61.021 (o 23,6 %), a axuda de 426 euros, e 11.061 (o 4,2 %), a RAI. Un total de 105.820 parados, xa que logo, non reciben ningún apoio pola súa exclusión do mercado laboral.
 
En segundo lugar, porque, segundo o boletín mensual do SEPE, en Galicia cóbranse os subsidios máis baixos do estado. A prestación contributiva, que reciben os parados que traballaron e cotizado á Seguridade Social durante polo menos 360 días en períodos continuos ou descontinuos, ascendeu en Galicia o pasado mes de novembro (o último do que o SEPE dispón de datos desagregados por comunidades autónomas) a 823,5 euros, só por encima de Canarias (784,4 euros) e Melilla (811,16), son 37 euros por baixo da media, e máis de 125 euros menos que os case 950 que cobran os parados en Navarra e no País Vasco.
 
Enquisa de poboación activa
 
Finalmente, se se toman en conta os datos da última enquisa de poboación activa (EPA), a situación de Galicia tamén resulta dramática. Na comunidade hai hoxe 1.025.000 fogares, e en 65.000 deles, aínda que hai unha ou máis persoas en idade de traballar, todas elas están no paro.
 
Se a esas familias se suman as outras 286.000 nos que non hai membros en idade ou en condicións de traballar, o resultado son 351.000 unidades familiares nas que ninguén ten un emprego. É dicir, o 34 % do total. Unha de cada tres.