Alemaña dá tres ordes cada vez que se lle pregunta por como se debe afrontar a crise: recortar, recortar e recortar. A fórmula para executar os axustes (ese eufemismo que se expandiu na crise para definir os recortes) é o de menos. A cuestión é acabar co déficit público sexa polo camiño que sexa. Subas de impostos, eliminación de dereitos sociais, redución do gasto público, reformas laborais insoportables para os traballadores... Todo vale. E se se usan todas as medidas á vez, como anunciou o Goberno de Mariano Rajoy, moito mellor. Que leven o país a unha recesión máis ou menos profunda e máis ou menos prolongada non lle parece o problema máis importante ao Executivo de Angela Merkel.
 
Por iso, ante o impulso coa tesoira que tomaron os ministros de Rajoy, o Goberno alemán está exultante. Tanto ou máis que tras os recortes de 15.000 millóns acometidos por José Luis Rodríguez Zapatero en maio de 2010, que tamén celebrou (despois de esixilos), e tras as reformas acometidas en España durante este verán, que serviron para que nos puxesen de exemplo en varios cumios fronte á parálise reformista de Italia.
 
"Celebramos o estrito programa de austeridade", di Westerwelle.
 
Encargouse de transmitir a mensaxe de apoio o Ministerio alemán de Exteriores, dirixido por Guido Westerwelle. Nun comunicado, celebrou o anuncio do Goberno español de reducir en 8.900 millóns o gasto público e elevar en 6.200 millóns os ingresos cunha suba de impostos. Pero, sobre todo, mostrouse encantado co anuncio de que haberá unha axenda "moi agresiva" de recortes e reformas, en palabras de Luis de Guindos, ministro de Economía. "Celebramos a intención do Goberno español de encamiñarse cara a un estrito programa de austeridade, tal e como mostran as medidas recentemente adoptadas para consolidar os presupostos", asegura na nota. E engade: "Apoiamos o Goberno español nese camiño e mostramos o noso gran respecto coa decisión con que se toman eses recortes dolorosos e inevitables". Inevitables porque, ao seu xuízo, a desviación do déficit ata o 8%, fronte ao 6% ao que se comprometera España, "demostra a necesidade dun consecuente curso de consolidación". É dicir, máis recortes. É a forma de avalar dende o Goberno alemán a frase do vicepresidente do Goberno, Soraya Sáenz de Santamaría, de que isto só é "o inicio do inicio".
 
O respaldo de Alemaña non vai servir, non obstante, para que a economía española cambie de rumbo e o ton negativo no que se instalou o PIB vai tender a peor, moi a peor, aínda que iso preocupe menos no Goberno de Merkel. Segundo as previsións feitas públicas onte por Goldman Sachs e por Fitch, a economía española enfróntase ao risco de rematar este ano cunha caída do 1,5% no PIB. O banco de investimento díxoo con total rotundidade, mentres que a axencia de cualificación de riscos se moveu en terreo máis movedizo: a súa previsión varía entre rematar o exercicio cun crecemento nulo ou rematar cun descenso do 1,5%. E entre as predicións pesimistas, Goldman Sachs mostrouse convencido de que a tesoirada de Rajoy (nin o anunciado nin o que está por vir) non conseguirá rebaixar o déficit público este ano ao 4,4% prometido á UE. Ao seu xuízo, rematará no 5,5%, o cal supoñería un descenso de polo menos 2,5 puntos con respecto ao que o Goberno considera como peche de 2011.
 
Precisamente, esa desviación do déficit é un tema que a Comisión Europea espera discutir co Goberno de Rajoy nas próximas semanas. E se Alemaña pide recortes, a UE tamén fai as súas peticións, e onte formulou como posibilidade que se suba o IVE, ao tempo que mostrou grande esperanza nas reformas que se van presentar nos próximos tres meses. O voceiro da Comisión Europea, Olivier Bailly, asegurou que compete ao Goberno determinar que medidas adicionais adopta, pero tamén deixou claro que as anunciadas ata agora non son suficientes. Iso si, a diferenza da mensaxe alemá, Bailly destacou que non só hai que recortar senón tamén aprobar políticas que impulsen o crecemento.
 
Bruxelas móstrase favorable a que tamén se aplique unha suba do IVE
 
"Antes de tomar medidas para reducir o déficit, o Goberno ten a posibilidade de discutir coa Comisión o que acontece de xeito estructurado", dixo, aínda que se mostrou remiso a concretar cales serán as próximas reunións co Goberno español e cal será o seu contido. O que si fixo foi recordar que as recomendacións que a Comisión fixo no pasado pasan por elevar o IVE.
 
Desas reunións non formará parte Rajoy, porque serán de carácter técnico. O presidente do Goberno leva sen comparecer publicamente dende o 21 de decembro, cando anunciou a composición do seu Consello de Ministros e respondeu á única pregunta que concedeu á prensa cun " gracias ". Nin sequera rendeu contas o pasado venres cando o Consello de Ministros aprobou a tesoirada. Agora, o seu equipo baralla que sexa a próxima semana cando dea explicacións. O formato desta posible comparecencia non está aínda pechado. Segundo informou EP, o xefe do Executivo podería facer unha convocatoria aos medios para dar explicacións, empregar o pleno do Congreso do día 11 para este fin ou utilizar outras vías.
 
Salvo cambios de última hora, a axenda pública do presidente durante esta semana concéntrase no Consello de Ministros de mañá, onde se aprobarán novas medidas, e na celebración, o venres, da Pascua Militar no Pazo Real.