O persoal da Xunta segue reducíndose a consecuencia da política de axuste de persoal impulsada tanto polo Executivo autonómico como polo central, e os últimos datos que manexa o primeiro confirman unha nova redución. En concreto, a Administración galega pechou o primeiro semestre do ano cun total 88.842 empregados públicos, o que representa un descenso de 111 efectivos respecto ao mesmo período do ano anterior.
 
A pesar de que o presidente da patronal, Joan Rosell, insinuaba hai uns días a necesidade de que as administracións poidan despedir a funcionarios en caso de necesidade, o certo é que Galicia xa está a cumprir os criterios á hora de axustar ao máximo o gasto en persoal. A cifra de efectivos ao servizo de San Caetano é a máis baixa desde que se iniciou a crise e as previsións son que, lonxe de incrementarse, durante 2012 siga reducíndose.
 
Dous son os motivos que explican a redución experimentada no persoal de traballadores da maior ‘empresa' de Galicia. Por unha banda, a freada á contratación de interinos e traballadores temporais pola non cobertura das baixas. E polo outro, a taxa de reposición do 10% marcada polo Goberno central nos últimos anos, o que provoca que a maior parte das xubilacións non se cubran con novos traballadores/as.
 
PREVISIÓN
 
A previsión para o exercicio 2012 indica que a Xunta manterá a mesma tendencia de axuste no capítulo de gasto de persoal. De feito, na memoria de orzamentos do próximo ano especifícase que na Administración galega «non se incrementa o número de efectivos» salvo en dúas excepcións: as incorporacións por cumprimento de sentenzas xudiciais que obrigan a converter en indefinidos a traballadores temporais, e a execución de programas de carácter temporal iniciados xa en 2011.
 
A Administración galega prevé destinar o próximo ano 1.977 millóns de euros ao pago de nóminas (sen incluír o Sergas), o que representa un descenso de 22,2 millóns sobre 2011. Segundo consta nos orzamentos, este descenso afecta a sete consellerías, ao Parlamento e ao Consello de Contas, mentres que o gasto sobe en tres departamentos.