Fixo tantas promesas e tantas críticas ao goberno anterior e vai ter que facer o que este fixo -ben por obriga, ben por convencemento- que as medidas que se aveciñan van entrar en conflito coa parte dos seus votantes que non poidan desfacerse da súa dignidade.
 
Unha desas promesas é a de que non crearía un "banco malo" a custa dos impostos dos cidadáns. O deste "banco malo" é unha carreira da prensa mediática afin ao PP -que é a maioría- para facer esquecer e, mesmo, negar as promesas do partido tardo-franquista.

En todo caso, asistiremos ao travestismo mediático en próximas datas de presentalo como, primeiro necesario, para despois presentalo como bo e demandado pola propia cidadanía. É a prensa do Movemento do PP (ABC, El Mundo, La Razón, La Gaceta, Telemadrid, etc.).
 
Aínda que xa existen diferentes bancos "malos" na UE, todos teñen unha consecuencia tarde ou cedo: que os cidadáns, cos seus impostos, pagarán os chamados "activos tóxicos". Ese é o fin e a garantía. Garantía que non chega, por certo, a que os bancos así exonerados da súa mala xestión do crédito vaian por iso a aumentar este a particulares e empresas. Tal é así que esa desconfianza e a contracción do crédito levou o BCE de Mario Draghi a facilitar crédito aos bancos pola xigantesca cifra de 500.000 millóns de euros o día 21 deste mes dándolle a máquina -non pode facelo doutra forma- de facer billetes.
 
É así como actúa un banco central, nada extraordinario: crea diñeiro cando concede un crédito e destrúeo cando se amortiza, pero moitos criticaron en cambio cando fai iso mesmo comprando débeda soberana dos países. A miña opinión é que iso non vai supoñer un aumento do crédito no estado e é dubidoso que no resto da U.E. porque van destinalo case todo a comprar débeda soberana nun negocio doado: contrátano como prestatarios ao 1% co BCE e devólveno como prestamistas aos Estados comprando bonos ao 4% ou máis.

Para que van arriscar concedendo préstamos a empresas e particulares?
 
O dos "activos tóxicos" é outro eufemismo que trata de gravar na mente da cidadanía de que estes activos deben separarse dos activos bos como os virus e bacterias das células boas. É unha estupidez, porque nada ten que ver a bioloxía e os seus contaxios co crédito.
 
Os "activos tóxicos" que os coman os bancos que os crearon e punto. Non porque se agrupen nun banco van deixar de ser incobrables ou morosos, porque non porque estean xuntiños os "tóxicos" van converter en solventes aos seus debedores.
 
A patronal proclama que estes activos os paguemos entre todos, estes tipos que tanto defenden a economía de mercado e a non intromisión do estado nos seus asuntos reclaman, cando lles interesa, que sexa o estado o que pague. A súa intención é coñecida: privatizar as ganancias, socializar as perdas. E niso están.