Aos recortes non escapan os servizos públicos esenciais, o repago (pagar dúas veces polo servizo, camuflado baixo a eufemística denominación de copago) imponse na sanidade, redución de mestres e incremento de horas lectivas na educación primaria e secundaria e unha xeneralizada política de despedimentos de persoal interino e contratado xunto coa política de non repoñer baixas e xubilacións prefiguran un futuro cada vez máis escuro dentro da administración pública.
 
A crise vívese nas Universidades galegas dun xeito diferente en cada unha delas, a situación sendo difícil para todas elas parece máis problemática na USC que nas outras dúas universidades.
 
Na UDC vívese cunha certa incerteza os retrasos nas aportacións que se teñen que recibir doutras administracións, sobre todo da Xunta, as máis numerosas e cuantiosas, aínda así aseguróusenos no Consello de Goberno que os pagos se seguen a facer cunha frecuencia “razoable”, todos os provedores cobran nun prazo de 30 días, e as nóminas non perigan.
 
De momento o orzamento está prorrogado e, segundo as noticias aparecidas na prensa é previsible “unha lixeira baixada”.
 
Vigo aprobou onte uns orzamentos para o 2012 que supoñen un descenso dun 3% respecto ao ano anterior. Neste caso o gasto en persoal tamén minguou, e para racionalizar o gasto corrente a institución apertarase o cinto en todo tipo de actuacións, desde cursos e conferencias ata servizos externos de limpeza e aseo. Tampouco se librarán o material de oficina, os servizos de comunicación ou de vixilancia, entre outros.
 
Os ingresos da USC reduciuse en seis millóns de euros. Hai menos, e hai máis gastos, porque os profesores conseguen trienios, quinquenios e sexenios que hai que abonarlles, e os gastos correntes soben pola subida de conceptos como a luz ou a calefacción. ¿Que facer? Sara Cantorna, vicerreitora de Economía, teno claro. Se se aplicase o recorte de seis millóns de forma proporcional habería que botar a persoal, porque supón o 67% do gasto, pero este capítulo non se tocou. Aínda así, necesítanse máis recursos para abonar os novos complementos, polo que a USC recorrerá á non cobertura de baixas nin de vacantes por xubilación, neste último caso salvo que sexa imprescindible para garantir a docencia. En canto aos gastos correntes, aplicaranse medidas como o peche dos centros polas tardes as dúas próximas semanas.