O discurso de Mariano xirou esencialmente entorno á crise económica e ás solucións que desde o neoliberalismo máis rancio prepararon.
 
Describiu un panorama absolutamente tenebroso no que apuntou previsións de decrecemento incluso para vindeiros anos, sinalou que o déficit público chegou a 65.000 millóns (o 6% do PIB) comprometéndose a reducilo en 16.000 millóns até o 4% do PIB comprometéndose a realizar unha profunda reforma (a primeira prioridade para el) na administración coa finalidade, dixo, de evitar as duplicidades e impoñer a austeridade.
 
Anunciou a supresión de organismos públicos, puxo de manifesto que a taxa de reposición continuará en cero e que non se incrementará o persoal público a excepción dos corpos de seguridade.
 
Anunciou, tamén, diversas reformas no eido laboral, dixo que se propón elevar a idade real de xubilación á idade legal  e que suprimirá as prexubilacións "salvo en circunstancias moi excepcionais", impulsará os sistemas “complementarios” de pensións (pulará as pensións privadas), mellorará a tributación das prestacións dos plans privados de pensións., incentivará a contratación de mozos/as e modificará o calendario laboral para trasladar os festivos aos luns para reducir as pontes.
 
Confirmou que actualizará as pensións a partir do 1 de xaneiro de 2012 o que "será o único compromiso que me van escoitar no día de hoxe de aumento de gasto"
 
Anticipou que o seu Goberno manterá o IVE "superreducido" do 4% na compravenda de vivendas habituais e que recuperará a dedución fiscal no IRPF para a adquisición de vivenda habitual.
 
Previo a este día Rajoy mostrara a súa intención de volver poñer sobre a mesa unha reforma laboral. Para iso, reuniuse cos máximos dirixentes dos sindicatos maioritarios e co xefe da patronal. Rajoy instou os axentes sociais para que se poñan de acordo antes do 6 de xaneiro.
 
Os sindicatos maioritarios a súa vontade negociadora e xa fixeron pronunciamentos a favor da moderación salarial
 
Os obxectivos da patronal son coñecidos des de fai tempo: "simplificar" a lexislación laboral, flexibilizar os contratos a tempo parcial e de formación, eliminar a referencia salarial ao Índice de Prezos de Consumo (IPC), dotar á empresa de instrumentos de flexibilidade interna, o que inclúe conceptos como a porcentaxe anual de dispoñibilidade por parte da empresa, bolsa de horas, horas extra e flexibilidade funcional; e facilitar o convenio de empresa e o descolgue dos convenios colectivos, eliminar a ultraactividade. Ademais, o grande obxectivo da CEOE é alcanzar un novo pacto de moderación salarial para o período 2012-2015.
 
Outra esixencia da patronal para esta nova reforma é situar a indemnización habitual por despedimento en 20 días por ano cun máximo de 12 mensualidades a intención da patronal é que dea igual ser contratado indefinido ou temporal.
 
A medicina de Rajoy é unha nova dose, reforzada, da que, no seu día, nos receitou Zapatero . Os mercados, o capital e os empresarios mandan e, como non espabilemos o futuro para a clase obreira preséntase desolador.
 
Nas nosas mans está darlle ao sr. Rajoy e ao capital que o sustenta a resposta que se merecen.