O estado español achegará uns 14.860 millóns de euros ao FMI no marco do acordo alcanzado pola eurozona para aumentar os recursos da institución en 150.000 millóns co fin de que poida axudar mellor aos países do euro en dificultades.
 
Os ministros de Finanzas da Unión Europea analizaron nunha conferencia telefónica o aumento dos recursos do Fondo Monetario Internacional (FMI) a través de préstamos bilaterais dos 17 países da eurozona e os demais membros da UE tras prometer no último cumio europeo que considerarían incrementar a súa achega en 200.000 millóns de euros.
 
A idea era que a eurozona achegase 150.000 millóns de euros e que os restantes 50.000 millóns provirían do resto de membros da Unión Europea, pero de momento os 17 países do euro só lograron compromisos por parte da República Checa, Dinamarca, Polonia e Suecia, mentres que o Reino Unido se negou a participar e indicou que só o fará no marco do GR-20.
 
"O Reino Unido indicou que definirá a súa contribución a principios do próximo ano no marco do GR-20", sinalou o presidente do Eurogrupo e primeiro ministro luxemburgués, Jean-Claude Juncker, nun comunicado tras a conferencia telefónica.
 
O ministro británico de Finanzas, George Osborne, confirmara pouco antes que o seu Goberno non fará achegas extra ao FMI, porque se ben o Reino Unido está disposto a axudar ao Fondo non quere darlle máis recursos se só se beneficia a zona euro.
 
Un voceiro do Tesouro británico xa explicou a semana pasada a Efe que o Reino Unido está "disposto a incrementar os recursos do FMI xunto con outros países do mundo co fin de axudar a calquera nación con problemas".
 
Neste contexto, os ministros de Finanzas da UE pediron hoxe aos "membros do GR-20 e outros membros do FMI financeiramente fortes que apoien os esforzos para salvagardar a estabilidade financeira mundial contribuíndo a incrementar os recursos do Fondo", segundo o comunicado.
 
Pero o aumento dos recursos da institución financeira dirixida por Christine Lagarde por parte da eurozona e dos outros catro países da UE que indicaron a súa disposición a participar no proceso non está garantido, dado que para algúns Estados membros da Unión, "os compromisos están suxeitos a aprobación parlamentaria", advirte Juncker.
 
A repartición da contribución dos 150.000 millóns de euros por parte da eurozona ao FMI basearase nas cotas establecidas a partir da reforma que se acordou en 2010 no fondo.
 
A achega do estado ascenderá en consecuencia a 14.860 millóns de euros (o 9,91%), segundo unha desagregación indicativa facilitada polo Consello Europeo.
 
A maior achega corresponderalle a Alemaña (41.500 millóns, seguida de Francia (31.400 millóns) e de Italia (23.480 millóns).
 
Para a UE, o aumento dos recursos do FMI, con sede en Washington, "reforzará a capacidade do Fondo para cumprir as súas responsabilidades sistémicas de apoiar os seus membros, o que é especialmente importante tendo en conta a ralentización económica actual e as tensións nos mercados financeiras".
 
En calquera caso, subliñan os ministros de Finanzas, calquera axuda do FMI aos países europeos se baseará nas condicións normais do Fondo, o que se traduce nunha supervisión e en plans de axustes e reformas como é o caso de Grecia, Irlanda e Portugal.
 
A UE e en particular a eurozona din estar "plenamente conscientes da súa responsabilidade especial" na crise actual e por iso os ministros recordan que no cumio do 8 e 9 de decembro todos os países do bloque comunitario salvo o Reino Unido pecharon un pacto presupostario para garantir a disciplina fiscal, entre outros acordos.