A crise golpea. Afecta aos cidadáns, que moitos deles perden o seu traballo, a súa vivenda, as súas pensións ou os servizos sociais. Aos bancos tamén lles afecta, pero doutra forma. Gañan menos, pero seguen gañando. Os grupos bancarios que operan no Estado lograron un beneficio neto conxunto de 9.328 millóns de euros entre xaneiro e setembro, o que resulta un 15,4% menos que no mesmo período de 2010, debido á menor demanda de créditos e ao incremento da morosidade, froito da propia crise.

Segundo a Asociación Española de Banca (AEB) estas contas non inclúen o Banco de Valencia, posto que a entidade foi intervida polo Banco de España o pasado 21 de novembro.

Pedro Pablo Villasante, secretario xeral da (AEB), explicou que estes resultados se obtiveron nun ámbito económico difícil, aínda caracterizado polo estancamento da actividade e as tensións nos mercados financeiros.

Así mesmo, a morosidade da banca creceu ata o 4,65% dende o 4,27% que había en setembro de 2010, ao tempo que o ratio de cobertura empeorou ata o 59%, dende o 67% dun ano antes.El crédito á clientela creceu o 2,4% e situouse en 1,39 billóns de euros a finais de setembro, en tanto que os depósitos dos clientes aumentaron o 6,1% e alcanzaron os 1,13 billóns, o que mellorou a cobertura de créditos con depósitos ata o 80,9% dende o 78,1% que había un ano antes.

A banca pide reformas "efectivas"

A banca pediu  máis esforzos para corrixir o déficit público e reformas estruturais "efectivas" que permitan á economía gañar competitividade e saír dunha situación "delicada", na que hai posibilidades de "entrar en recesión".

Villasante engadiu que as reformas deben ir dirixidas a rebaixar a prima de risco de España, que condiciona o financiamento das empresas nacionais.

Na súa opinión, débese "perseverar" na corrección do déficit público para lograr os obxectivos comprometidos e ao mesmo tempo, traballar para gañar competitividade.

É dicir, menos servizos públicos (menos gasto público), máis negocio e cartos para eles.