Dise que os gregos son uns vagos e que os alemáns son os campións da produtividade en Europa. Non obstante, estes datos publicados pola Oficina de Estatísticas Europea, para as horas traballadas nos 27 países da Unión Europea din outra cousa: os alemáns non son os máis produtivos de Europa e os gregos non teñen nada de frouxos. De feito son os que máis traballan, como mostra a primeira gráfica.
 
Esta semana demos conta da falacia do chamado dispendio dos países da periferia, ao contrastar os datos para a débeda pública da eurozona e a súa variación entre 2000 e 2010. Durante moito tempo botouse a culpa a este dispendio da actual crise e resulta que os países máis "desbaldidores" e que aumentaron significativamente a súa débeda pública, son Francia e Alemaña. Agora, datos en man podemos ver os que son os que traballan máis horas á semana e que son os máis produtivos.
 

 
Cando nos fixamos nos números reais, os gregos son os maiores traballadores europeos xunto cos austríacos: 43,7 horas por semana fronte a 42 horas dos alemáns. España traballa 41,6 horas á semana, mentres Francia 41,1 horas. Os italianos están máis abaixo con 40,5 horas. Os máis frouxos son os daneses, que traballan 39,1 horas... Polo lado da produtividade (segunda gráfica) a de Alemaña é só un 23,7% maior á media da Unión Europea. Neste indicador gaña lonxe Luxemburgo, cunha produtividade 89% maior á media europea. Ségueo bastante lonxe Holanda, con 36,5% superior á media europea; Bélxica con 34,7%; Francia con 32,7%, e Irlanda con 25,6%. España tamén está sobre a media cunha produtividade de 7,9%. Pode ver aquí o gráfico interactivo.
 
Estes datos de Eurostat foron publicados onte, durante a reunión dos líderes europeos para rescatar a moeda única. As cifras móstrannos que hai moito de prexuízo cando se trata os gregos de frouxos, ou cando se di que os alemáns son os máis traballadores de Europa. Se algunha vez iso foi así, hoxe a cousa cambiou. Co lacerante desemprego xuvenil que en Grecia chega ao 43,5%, é esperable que calquera grego con traballo se senta moi afortunado e que se aferra a ese traballo con forza. Isto tamén nos achega datos sobre a deterioración que vive parte importante da poboación europea.

 
 
Máis información | EuroStat