Damos conta da atenta comunicación de Julio Guiral, presidente da devandita asociación, e do informe xurídico completo, de extraordinario interese para a reivindicación no ámbito da Administración asturiana dunha aplicación real e efectiva do dereito fundamental do artigo 23.2 da Constitución a acceder aos postos de traballo do sector público en condicións de igualdade, que pasa ineludiblemente por esixir ao Goberno asturiano a aprobación de ofertas públicas de emprego completas e pola publicación das convocatorias nos prazos legalmente previstos.
 
"A Asociación para a Defensa da Función Pública Aragonesa, que presido, tivo acceso a un ditame elaborado polo profesor Miguel Sánchez Morón, catedrático de Dereito Administrativo e presidente da Comisión de Expertos para a preparación do Estatuto Básico do Empregado Público, no que se analiza o deber das Administracións Públicas de incluír na oferta anual de emprego público as prazas vacantes ocupadas por persoal interino e de publicar en prazo as correspondentes convocatorias de procesos selectivos.
 
O ditame, con data 30 de setembro de 2011, parte da constatación das altas taxas de interinidade que se rexistran no emprego das distintas Administracións Públicas do noso país, sinalando que "a interinidade coa que se desempeñan a maioría deses postos de traballo non ten xustificación ningunha, nin en termos xurídicos nin de boa administración".
 
Destaca o ditame a decisiva toma de posición do lexislador ao aprobar o Estatuto Básico do Empregado Público, ao establecerse a obriga de incluír na Oferta de Emprego Público as prazas vacantes ocupadas por persoal interino.
 
Malia a claridade da norma sobre tal obriga, destaca o ditame o substancial incumprimento por parte das Administracións Públicas da obriga de incluír na oferta de emprego público de cada ano as prazas vacantes ocupadas por interinos ou persoal temporal que non haxan de ser amortizadas, sen que existan razóns válidas de ningún tipo que xustifique tal incumprimento, criticándose o negativo efecto que na corrección da interinidade ten a definición da "taxa de reposición" de efectivos que incorporan anualmente as Leis de Presupostos.
 
Seguidamente, o autor destaca a reacción do Tribunal Supremo ante tal infracción legal, analizando a "transcendente" sentenza ditado pola Sala Terceira do Tribunal Supremo, en data 29 de outubro de 2010 e en recurso de casación interposto pola Asociación para a Defensa da Función Pública Aragonesa, dirixido contra a Oferta de Emprego Público de 2007 do Goberno de Aragón, por incumprir a obriga legal de incluír nesta a totalidade das prazas vacantes ocupadas por persoal interino. Como sinala o ditame, "o decisivo é que o Tribunal Supremo acepta totalmente a formulación da Asociación recorrente", dado que a permanencia ilegal de funcionarios interinos en prazas vacantes que deben saír a oferta pública impide ao resto dos cidadáns optar en condicións de igualdade por acceder a eses postos da función pública, que non son patrimonio dos que os desempeñan.
 
O ditame destaca o dobre feito de que o Tribunal recoñece a lexitimación da Asociación -discutida polo sindicato Comisións Obreiras- para recorrer contra a aprobación da oferta de emprego público e de que a infracción legal se combate polo procedemento especial de recurso contencioso-administrativo para a protección de dereitos fundamentais, ao ter considerado esta Asociación que o incumprimento da lei supoñía unha vulneración do dereito fundamental de acceso á función pública que se recoñece os cidadáns no artigo 23.2 da Constitución Española.
 
En definitiva, e así conclúe o ditame comentado, as Administracións Públicas están inescusablemente obrigadas a incluír nas ofertas de emprego público que aproben anualmente todas as prazas vacantes de persoal que estean provisionalmente desempeñadas por funcionarios interinos ou persoal laboral non fixo, de modo que o incumprimento de dito deber non só supón unha infracción da legalidade vixente, senón unha violación do dereito fundamental a acceder aos cargos e funcións públicas en condicións de igualdade, que sanciona o artigo 23.2 da Constitución.
 
Para os membros desta Asociación constitúe unha enorme satisfacción que a sentenza obtida no Tribunal Supremo, resultado do labor de defensa e reivindicación do dereito de acceso dos cidadáns á función pública, fose obxecto de comentario por un dos administrativistas máis prestixiosos do noso país.
 
Por estar razón, e coa finalidade de compartir con vostedes o ditame do profesor Sánchez Morón, achégolles unha copia do citado ditame e da sentenza do Tribunal Supremo á que se alude neste.
 
Con iso desexamos igualmente animar a esa entidade a reivindicar o respecto ao dereito fundamental de acceso á función pública ante a Administración Pública, reclamando o respecto ao criterio expresado polo Tribunal Supremo, con fundamento no Estatuto Básico do Empregado Público, interpoñendo se fose necesario os recursos pertinentes ante os Tribunais, co fin de asegurar o respecto da legalidade administrativa e do réxime de acceso á función pública conforme a criterios de igualdade, publicidade, mérito e capacidade, sen cuxa vixencia a función pública se vería privada, dunha das notas esenciais coas que a configura a nosa Constitución.
 
Confiando en que a documentación que lles remito resulte do seu interese, reciban un cordial saúdo"
 
INFORME ÍNTEGRO