Mentres Xunta e Goberno central aplicaron recortes severos tanto nas súas plantillas como no número de altos cargos, estas medidas de austeridade non tiveron reflexo de momento nos presupostos das administracións locais. A pesar da crise e da asfixia financeira que padecen, tanto concellos como deputacións dispararon o gasto en persoal contratado a dedo nun 76% dende que se iniciou a recesión económica no ano 2007 e ata o pasado exercicio e ademais destinaron un 25% máis a pagar altos cargos.
 
En concreto, durante os últimos catro anos, coincidindo co inicio da crise, os presupostos para o persoal das administracións locais creceron nun 19,9%. O rechamante é que o maior incremento do gasto se produce precisamente no denominado "persoal eventual de gabinete", o que revela unha aposta cada vez maior de concellos e corporacións locais pola contratación "a dedo". Así, as partidas destinadas aos traballadores que conseguiron a súa praza tras aprobar unhas oposicións eleváronse só un 22,8% dende 2007, mentres que o presuposto para persoal de confianza creceu tres veces máis.

Presupostos
 
Segundo os presupostos de concellos e deputacións, recompilados polo Instituto Galego de Estadística (IGE), para o ano 2010 o gasto previsto en persoal elevouse a 921 millóns de euros, dos cales 774,9 millóns corresponden aos concellos e o resto ás corporacións provinciais. Antes de que aumentase a crise, non obstante, as administracións locais tiñan menos gasto no seu persoal: 767,7 millóns, dos cales os municipios acaparaban 641 millóns. Pero maior foi o incremento que experimentou o persoal de confianza, sobre todo nas deputacións. Aínda que os datos do Instituto Galego de Estatística (IGE) non detallan datos por provincias, revelan como as corporacións provinciais pasaron de gastarse 1,1 millóns en 2007 a case triplicar este gasto o pasado ano: 2,9 millóns de euros.
 
Tamén os concellos dispararon os seus presupostos para persoal eventual dende os 5,6 millóns consignados antes da crise aos 8,8 millóns de 2010.
 
E, a contracorrente do que están a aplicar outras administracións, concellos e deputacións aumentaron altos cargos. O pasado ano gastáronse 31 millóns de euros en edís e outros responsables da corporación local, case sete millóns máis que en 2007.
 
De novo as que máis se excederon foron as deputacións, que elevaron os seus presupostos para pagar altos cargos nun 41,9%. No caso dos municipios, o incremento foi menor, de 23,8%.
 
Este maior o gasto das administracións pode deberse tanto a un incremento no número de altos cargos coma a unha mellora nas súas retribucións.