Con motivo de amortizar a débeda dos préstamos hipotecarios, a banca está a actuar en Lorca de xeito legal, pero non de todo ético, segundo os seus críticos.
 
A Asociación de Usuarios de Bancos, Caixas e Seguros de España (ADICAE) considerou hoxe de «lamentable» a actitude da Banca en Lorca. O Valedor do pobo na Rexión de Murcia, José Pablo Ruiz Abellán, recibiu as queixas de decenas de afectados denunciando que as entidades bancarias están a quedar o diñeiro procedente do Consorcio de Seguros, coa finalidade de amortizar a débeda do préstamo hipotecario.
 
«A Banca está a quedar co diñeiro que o Consorcio de Seguros paga a aqueles que perderon a súa vivenda polo terremoto acontecido en Lorca (Murcia), o pasado 11 de maio,». Así o denunciou Ruiz Abellán. ADICAE considerouno unha actitude «deplorable e vergonzosa» por parte da Banca, cuxo fin é «amortizar a débeda do préstamo hipotecario».
 
Ruiz Abellán denunciou que os afectados non saben como comezar a construír unha nova casa posto que quedaron sen domicilio e sen diñeiro por culpa desta actuación abusiva das entidades financeiras. A xuízo do Valedor do pobo, as entidades financeiras deben considerar como garantía hipotecaria o diñeiro que chega do Consorcio de Seguros, en lugar de apropiarse destas cantidades para amortizar as hipotecas que teñen vixentes os afectados polo sismo.
 
Ruiz Abellán reclama as entidades de crédito que consideren o diñeiro do Consorcio «en plan finalista, de forma que sirva de garantía da débeda que tiña o propietario da vivenda co banco e llelo vaian dando conforme se vaia construíndo a nova». Engade que «decenas de afectados se dirixiron á devandita institución denunciando esta lamentable actitude das entidades financeiras».
 
ADICAE denunciou que «esta actitude das entidades financeiras volve poñer de manifesto que o único que lles importa, en realidade, é o seu propio beneficio». Os afectados, non obstante, deben ter en conta unha serie de aspectos de índole xurídico, dispoñibles no seguinte documento que redactou no seu día o Departamento de Servizos Xurídicos de ADICAE, que está a asesorar a decenas de lorquinos sobre como acceder ás axudas para reconstruír as vivendas sinistradas.
 
En opinión de Santiago Pérez, secretario de ADICAE:«a cláusula na que as indemnizacións de determinados seguros se destinan directamente ao banco como beneficiario é por desgracia moi habitual e pode conducir a situacións dramáticas ou inxustas, como a que agora ten lugar. É necesario que se aprobe lexislativamente que as indemnizacións que o Consorcio concede en caso de catástrofe vaian parar directamente o usuario e se arbitre un procedemento de mediación coas entidades financeiras no que participen asociacións de consumidores como ADICAE para que se poida alcanzar unha solución satisfactoria para a entidade e para o usuario, que poida reiniciar unha nova vida en momentos tan difíciles. No caso de Lorca sería necesario, por exemplo, que as entidades financeiras que se están a quedar estas indemnizacións outorgasen préstamos a custo cero ou moi reducido ás familias afectadas».
 
En contradición con estas declaracións, o alcalde de Lorca, Francisco Jódar, lanzou hai uns días unha mensaxe de tranquilidade aos lorquinos afectados polos terremotos.
 
«Non» hai «constancia oficial de que houbese denuncias masivas neste sentido -matizou o máximo responsable do concello lorquino-. Si é certo que se deron casos particulares, que se puxeron en coñecemento do Concello de Lorca e interviñemos como intermediarios. A solución que se acordou coas entidades é crear unha conta a prazo fixo na que se ingresa o diñeiro da indemnización do cliente. Desta forma, o banco ou a caixa conta co aval de que manterá o seu dereito sobre o ben hipotecado cando este se reconstrúa e, por outro, os cidadáns teñen garantido o diñeiro que debe ir á reconstrución, xa que só se poden sacar fondos a medida que se vaian presentando certificacións de obra,».