Dentro da campaña "devolvamos a confianza aos mercados", PP e PSOE están a escenificar un superbo rolo no traspaso de poderes, e asegúrannos que Rajoy e Zapateiro, ademais de facer manitas políticas na comida do día da Constitución, falan por teléfono todos os días un momentiño, parece que con moi boa química.
 
Non cremos que o romance vaia a maiores e acaben fusionándose en partido único, un PPSOE, pero por agora todo son promesas de lealdade, e cantos á unidade e a superación de diferenzas para salvar España. Pois será todo o tranquilizador que queiran para os mercados, pero a outros inquiétanos.
 
De entrada, o primeiro xesto de unidade do siamés Zetajoy foi a súa adhesión inquebrantable ao eixe Berlín-París: apuntámonos á proposta de reforma de Merkozy antes que ninguén, sen coñecer aínda moitos detalles desta, e cando cada vez máis voces rexeitan en Europa que os gobernos francés e alemán collan o leme pola súa conta. Empezando polos seus propios países, onde os socialdemócratas denuncian a "xermanización" de Europa, a obsesión co déficit e a reforma do Tratado proposta. Faría ben Zapateiro, entre cana e cana, en atender ás recentes palabras do ex chanceler Helmut Schmidt, do SPD, ou ás do francés Hollande.
 
Pode que a reforma de Merkozy non chegue moi lonxe, pois enfróntase a non poucos receos e dificultades. De feito, talvez o propio Sarkozy non estea para contalo, xa que ten presidenciais en primavera. Pero dá igual: aínda que fracasen, nós facemos os deberes por adiantado, antes de que nolos poñan. Que aplicados.