O valor das promesas electorais.
Lin con atención as respostas dos candidatos ás preguntas que se lle fixeron por parte da Xunta de Persoal e Comité de Empresa. O que me pasa a min, polo menos, e que son escéptico en case todos os aspectos da vida e máis neste terreo, para exemplo o xa acorrido na etapa anterior (abonda con revisar o programa electoral do Sr. Barja) polo menos no que atinxe ao PAS Laboral. Que se pode esperar de quen non só non cumpre as promesas electorais senón que nin sequera cumpre o que está asinado léase Convenio Colectivo e os Estatutos da Universidade?.

 

Caza menor
Xa sei que a caza menor de empregados públicos ten unha afección numerosa, embebida do discurso neoconservador de tertulianos e outro tipo de xulgamundos fieis á voz do seu amo.
A popularidade dos empregados públicos é inversamente proporcional á da caza maior, pois xa se sabe que as pezas que poden cobrarse coa primeira están ao alcance de calquera e que, pola contra, abater os grandes depredadores non resulta tan sinxelo, xa que esixe un esforzo considerable.
Pola miña banda non me cabe máis que recomendar a eses numerosos afeccionados que extremen as precaucións cando saian de caza, non vaia ser que se peguen un tiro no pé -que as armas as carga o demo- e non se poida debidamente atender no seu centro de saúde debidamente recortado

O carril bus.
Escribo desde Coruña, aquí, durante uns días máis, teremos un carril bus que, entre outras cousas permite chegar nun tempo prudencial ao destino desexado utilizando un medio de transporte público, pouco contaminante e, para min que traballo na Universidade, asequible.
Teño que dicir que o carril bus non é só un carril para o bus, é tamén unha vía para outros vehículos de asistencia rápida (ambulancias, bombeiros…) e tamén para taxis e bicicletas.
Lin estes días no xornal que, consoante co incremento de rapidez deste medio de transporte, aumentara nunha grande proporción o seu uso, felicitábanse os estamentos municipais por ese éxito, veremos si  cando toque se fan a correspondente crítica  por comezar a ser, de novo, lento  e non compense a súa utilización.
A presión duns cantos comerciantes pode máis que as necesidades cidadás

CiU toma o pelo á cidadanía catalá
A menos de 48 horas de ter pechado as urnas que deron a CiU a vitoria nas xerais en Catalunya, o presidente Mas fixo públicas unha serie de medidas moi graves, e por isto ben escondidas durante a campaña electoral. O pasado 17 de outubro, o candidato Duran i Lleida xa avisou nun acto en ESADE: "Se contase as miñas ideas perdería as eleccións".
Non é isto unha tomadura de pelo?
Vivimos momentos de crise do sistema económico dominante nos que os seus defensores non dubidan en degradar a democracia para impoñer axustes neoliberais de inxustas consecuencias para a maioría. Dinnos que non hai alternativas, pero, entón, por que se esconden e evitan o debate democrático?
Porque nos toman por parvos..