O sector bancario recibiu un total de axudas públicas de 1,6 billóns de euros entre outubro de 2008 e decembro de 2010 procedente dos países da Unión Europea (UE), o que supón un 13% do Produto Interior Bruto (PIB) europeo, segundo datos publicados hoxe pola Comisión Europea (CE).
 
En cambio, o apoio público á economía real caeu en 11.700 millóns o ano pasado, o que supón un descenso de practicamente un 50% respecto a 2009.
 
Esta baixada débese, segundo o Executivo comunitario, á pouca demanda e ás restricións presupostarias aprobadas na maioría de países da UE.
 
É por iso que a Comisión propuxo hoxe estender a duración do marco temporal de axudas ao sector financeiro pero dar por rematado o marco de axudas aos sectores produtivos.
 
"A condición clave para desconectar a máquina de respiración asistida entre o Estado e o sector financeiro é que se solucione a crise da débeda soberana", declarou nun comunicado o vicepresidente da Comisión encargado de Competencia, Joaquín Almunia.
 
"Grazas ao control das axudas estatais, o apoio cumpriu cos obxectivos de protexer a estabilidade económica e financeira sen crear ata agora ningún dano irreparable á competencia no mercado común", engadiu Almunia.
 
O vicepresidente da CE indicou que anulará as normas actuais de axuda á banca "tan pronto como o permitan as condicións do mercado", e que asegurará que "a axuda recibida polos bancos e pola economía real se destina a crear crecemento e emprego".
 
Dos 1,6 billóns entregados ao sector bancario, case 1,2 billóns -é dicir, o 10% do PIB- destinouse a garantías estatais ao financiamento das entidades e a outras medidas de apoio á liquidez, segundo a CE.
 
Ademais, as institucións financeiras recibiron algo máis de 400.000 millóns de euros en medidas de recapitalización e tratamento de activos para mellorar a súa solvencia.
 
O 58% destas axudas foi entregado a bancos de tres países: Irlanda (25%), Reino Unido (18%) e Alemaña (15%).
 
Ademais, os gobernos europeos puxeron 82.900 millóns de euros a disposición temporal das empresas do sector produtivo, aínda que en 2009 se utilizaron 21.000 millóns e en 2010, 11.700 millóns.
 
A axuda á industria e aos servizos foi de 61.000 millóns de euros, ou dun 0,5% do PIB, dos cales un 85% se destinou a obxectivos de interese común.
 
Os Estados membros da UE tamén garantiron subsidios de ata medio millón de euros por empresa, aínda que estas medidas temporais foron abandonadas parcialmente o ano pasado e substituída por garantías, intereses reducidos, axuda ao capital risco ou investimentos en medio.
 
As axudas habituais, isto é, que non se instauraron a raíz da crise, permaneceron en 2010 a niveis similares aos de anos anteriores, concretamente en 73.800 millóns de euros -un 0,3% do PIB da UE-.
 
Así mesmo, a CE asegurou que en 2010 as administracións públicas recuperaron un 82% dos 12.000 millóns entregados en subsidios considerados ilegais polas autoridades europeas.  
 
Para esta xente a quebra dos estados membros coa eliminación e precarización dos servizos públicos inherente, é un asunto secundario, o importante é manter un sistema caduco que foi, en definitiva, o causante da crise que agora tan axilmente corren a arranxar facendo máis ricos aos seus causantes.