Rajoy, que xa se entrevistara co presidente de Bankia, Rodrigo Rato, recibiu tamén  o de La Caixa, Isidro Fainé, quen tamén ocupa a presidencia da Confederación Española de Caixas de Aforros (CECA). Ademais, tamén mantivo conversacións con responsables dos outros grandes bancos.
 
Ademais da preparación do Cumio europeo, Mariano Rajoy segue traballando na definición da estrutura do Goberno, o que implica decidir o número de ministerios, así como as competencias e o número de altos cargos que terá cada un dos novos departamentos.
 
Durante estes días, Mariano Rajoy seguiu mantendo tamén conversacións políticas. Ademais de falar por teléfono con Iñigo Urkullu, tamén o fixo co presidente da Generalitat catalá, Artur Mas.

Segundo se publica no xornal Cinco Días tamén está tendo reunións cunha delegación da CEOE na que se están perfilando unha batería de medidas.medidas

En moitas delas apréciase unha clara marca de impopularidade, como o pagamento por uso nas autovías para manter o investimento en estradas; unha suba da auga, a través da revisión dos canons de saneamento, co fin de asegurar a execución do Plan de Calidade das Augas (o investimento pendente ata 2015 é de 10.000 millóns), ou o encarecemento do combustible en medio céntimo por litro para que o Estado recade 150 millóns adicionais ao ano.

"O prezo por litro dos carburantes en países como Francia é superior en 20 céntimos ao prezo en España", xustifícase no informe ao falar do potencial para estirar os prezos do combustible (o que non di é canto cobran máis os franceses e francesas).

Sobre a tarifa da auga, a postura de partida de CEOE é que o custo anual dos servizos ascende a 13.000 millóns, dos que 4.000 millóns non se imputan ao usuario pola consideración de interese xeral. Dos 9.000 millóns restantes, o sistema cobre uns 6.000 millóns pola vía da factura que paga o cidadán. Esta situación débese ao "abuso" por parte das Administracións públicas na declaración de obras de interese xeral sen clara xustificación. Iso permite que moitas infraestruturas hidráulicas fosen financiadas presupostariamente con nula ou escasa repercusión aos usuarios", expón o documento que coordina Taguas, ex asesor económico de Moncloa.

A xuízo da patronal, é urxente "transmitir o usuario que un pagamento insuficiente pola auga incide negativamente na súa axeitada xestión e calidade". En CEOE barállase a petición de que sexan as comunidades autónomas os que impoñan a revisión tarifaria para evitar o receo e, mesmo, o custo político aos concellos. No borrador fálase dunha suba media de 20 euros ao ano por usuario.

Segundo puido saber CincoDías, o informe Taguas toca seis grandes paus: colaboración público privada en infraestruturas; as necesidades do país en materia de auga; carencia de equipamentos públicos; servizos e instalacións sanitarias; saneamento urbano e servizos cidadáns. Nel reúnense destacadas reivindicacións empresariais dos dous últimos anos e novas ideas.

Financiamento privado

Entre as carencias en equipamentos fálase de centros penitenciarios, hospitais e vivenda protexida en réxime de aluguer. No primeiro dos casos proponse un investimento mínimo de 1.600 millóns, soportado polo sector privado, para a construción de 20 cárceres.

A iniciativa que se refire a hospitais pasa por levantar 30 novos centros, para o que se requiren 2.700 millóns, que tamén sairían da colaboración público-privada a cambio de concesións.

En canto á vivenda protexida, premerase para lograr un programa de 250.000 casas, que se irían executando ata 2016, cun investimento de 17.500 millóns. As vivendas terían 70 metros cadrados e sairían en aluguer por uns 400 euros mensuais.

En materia de estradas recóllense fórmulas para crear novas fontes de ingresos. Dende a Comisión de Concesións insístese en que elevar os límites de velocidade incentivaría o tráfico de pagamento. Tamén se fala de xeneralizar o pagamento por uso en concesións que hoxe ofrecen tráfico libre; implantar a directiva Euroviñeta que grava o tráfico pesado; instalar peaxes nos accesos a grandes cidades, e licitar de novo contratos xa maduros de concesión de estradas.

As cifras do recorte

A redución do gasto público penalizou seriamente ao investimento, de cuxo recorte se obtén o 20% da consolidación fiscal en busca do obxectivo de levar o déficit público ao 2,1% do PIB en 2014, fronte ao 11,2% de 2009. Con todo, o investimento público cae dende o 4,4% do PIB en 2009 ao 2,6% previsto para o citado 2014