O Consello de Ministros aprobou este venres a medida, segundo a cal o conselleiro delegado do banco Santander seguirá cumprindo os requisitos de "honorabilidade" que esixe o Banco de España para os executivos do sector financeiro. Concédeselle o indulto á condena a tres meses de prisión e inhabilitación por un delito de acusación falsa cometido en 1994 contra uns acredores de Banesto cando era presidente da entidade.
 
A decisión pon ás claras o poder omnímodo da banca fronte aos poderes políticos. Maniféstase, tamén, con esta decisión a connivencia entre PSOE e PP no que ás solucións neoliberais que se están a aplicar á saída da crise.
 
Non fai moito que o PSOE, na campaña electoral, propoñía un cambio de rumbo político propoñendo medidas que non executara mentres gobernaba e agora, á vista das últimas decisións tomadas ( contrato de aprendizaxe, esta decisión que favorece os intereses da gran banca…) sacan á luz a gran mentira que se nos contou durante o proceso electoral.
 
Non confiamos en que se dean explicacións, non esperamos do gobernos saínte nin do que se vai a constituír un cambio nas políticas e unha aproximación aos intereses da maior parte da cidadanía, todo o contrario, pensamos que tanto co goberno do PSOE como co que se instalará na Moncloa, que non no poder (o verdadeiro poder está nas máns do capital), despois da trasferencia de “poderes” a solución ven do camiño da mobilización.