O documento, promovido a través da web do Instituto de Investigacións Biomédicas Alberto Sols, contaba ao peche desta edición con máis de 3.000 sinaturas.
 
O escrito censura os recortes que padeceu o centro por parte do Consell durante os últimos anos, de 9,8 millóns en 2009 a 4,6 en 2011, ata comprometer a súa sostibilidade. "Non se entende esta actuación cando, dende círculos do poder, se di que a investigación e a innovación son claves para saír do atranco actual", explica o manifesto. Nese sentido, sinala que o CIPF é un centro "de calidade" que contribuíu a que a biomedicina ocupe "un posto destacado" na investigación española. "Pero o que custou décadas de esforzo pode perderse se se toman as decisións equivocadas", advirte.
 
Mostras de apoio
 
Non é o único apoio que recibiron os investigadores valencianos. As dúas revistas científicas máis prestixiosas, Nature e Science, publicaron senllos artigos críticos cos plans da Generalitat. E recentemente, Deborah Burks, especialista en diabete, animou a través dun artigo na revista da Sociedade Española de Bioquímica e Bioloxía Molecular, a escribir ao conseller de Sanidade, Luis Rosado, máximo responsable do CIPF, en protesta polo ERE. De feito, Rosado recibiu centenares de cartas durante os últimos días ás que respondeu cun comunicado no que se vangloría que o CIPF sexa "o quinto centro inves-tigador de maior importancia en España", aínda que unha liña máis abaixo xustifica a adopción de "medidas de axuste" en contra de gran parte dos científicos que levaron ao centro a tan elevada posición.
 
Unha contradición "perversa", segundo Rafael Pulido, expresidente do comité de empresa e un dos investigadores afectados polo expediente presentado no CIPF. Pulido presentou o seu último achado en cancro de mama, a súa especialidade. Trátase dunha proteína, a PTPepsilon, que podería servir para mitigar os efectos da enfermidade. O traballo realizouse en colaboración con outros 11 laboratorios europeos pero, tras o peche do de Bioloxía Molecular do Cancro do CIPF, podería verse afectado. "É un ERE contra a saúde e fomenta que enfermidades aínda incurables, mañá sigan sen solución, lamenta Pulido.