Nada máis recibir as primeiras notificacións do Executivo autonómico anunciando unha redución dos fondos para programas de atención social, alcaldes e grupos da oposición de todas as cores políticas puxéronse de pé de guerra. Mesmo na Deputación de Ourense, feudo de Baltar, o PP se rebelou contra os recortes sociais da Xunta ao sumarse a dúas mocións presentadas por PSdeG e BNG contra a tesoirada ao Plan Concertado. Ante as primeiras queixas dos concellos, o departamento que dirixe Beatriz Mato saíu ao paso culpando destes "axustes" aos "recortes do 10% " en materia social por parte do Goberno central.
 
A mingua destes fondos en Galicia -que pasou dos 47 millóns previstos inicialmente aos 44,6 aprobados finalmente- afecta sobre todo á atención a domicilio coa que se asiste a persoas que non teñen aprobado aínda o seu programa de atención á dependencia ou xente que necesita axuda e a determinados proxectos municipais como os de integración de inmigrantes ou vellez activa. A Consellería de Traballo desmarcouse onte de novo dos cálculos feitos pola oposición, que cifran os recortes do presuposto para o Plan Concertado da Xunta nun 80%.