O presidente do PP, Mariano Rajoy, asegura que a lei de dependencia "non" é viable" e haberá que ir facendo "o que se poida", e opina que podemos ter o modelo de benestar que nos permitan os nosos ingresos, os nosos recursos e a nosa actividade económica".
 
Seguro de que os resultados electorais lle darán a presidencia, o candidato insiste nunha entrevista que publica  o diario El País, que a idea de que a súa prioridade é manter o poder adquisitivo das pensións e, a partir de aí, "haberá que recortar en todo".
 
Tamén advirte de que as prestacións por desemprego van baixar " pero non porque a xente deixe de cobrar, senón porque vai haber menos persoas con dereito a cobralas.
 
O candidato do PP á presidencia do Goberno sinala que o seu programa electoral formula unha revisión de todas as partidas presupostarias. Rajoy explica que "ao mellor haberá que facer menos obras públicas e dar prioridade a rematar as obras que xa están en marcha", pero tamén inclúe aquí a supresión de "moitos organismos autónomos". Reitera que haberá que facer moitas cousas e haberá que recortar de onde se poida".
 
Sobre a educación e a sanidade, o líder do PP insiste en que son competencias das comunidades autónomas ao tempo que apela a un "esforzo" nos próximos anos contra a fraude fiscal, a economía somerxida e a fraude na percepción das prestacións por desemprego.
 
En relación aos funcionarios, Rajoy asegura que, nestes momentos, non recuperarán o recorte do 5 por cento e mantén o interrogante sobre se esta recuperación podería darse nun futuro. "Xa veremos", di, pero "agora non é posible. Todo o mundo o sabe".
 
Rajoy tamén di que non teme ás reaccións sociais ou a posibles folgas xerais e sinala que intentará que non haxa, xa que o consideraría "inxusto", se ben admite que teñen dereito a facelas.
 
O presidente do PP recorda que a prioridade do seu Goberno é cumprir os compromisos asumidos en Bruxelas, que establece un déficit do 4,4 por cento, ao igual que a permanencia da moeda única.
 
Avanza que o primeiro que fará, se chega ao goberno, será aprobar a Lei de Estabilidade que desenvolve a reforma constitucional pactada este verán pero ademais se mostra decidido a "facer as reformas laborais pendentes, a máis urxente a laboral, antes do verán" e ademais concluír, "de xeito urxente, a reestruturación do sistema financeiro". Tamén adiante que non introducirá, en ningún caso, o copagamento sanitario nin subirá os impostos.
 
Á pregunta de quen será o seu ministro de Economía, o líder do PP afirma que xa o sabe pero que non o dirá ata que os españois lle outorguen a súa confianza nas urnas.