As cinco organizacións estudantís que encabezan as protestas contra a aplicación a nova Normativa de Permanencia na USC comunicaron este xoves nunha rolda de prensa conxunta que só participarán na reunión co equipo reitoral "si se tratan as catro principais obxeccións formuladas á Normativa".
 
O mantemento do non presentado, a eliminación da obrigatoriedade da matrícula das materias suspensas, a avaliación do traballo de fin de Grao con materias pendentes e a continuación das facilidades para a mobilidade internacional son os puntos a debater formulados como condición sine qua non para sentarse a negociar co reitor compostelán Casares Long.
 
Segundo as organizacións, estas condicións xa fóronlle comunicadas ao equipo reitoral da USC a través de "unha carta aberta" asinada conxuntamente por IESGA, Movemento Estudantil Universitario (MEU), Liga Estudantil Galega, Agir e Comités. No comunicado tamén esixen que a negociación se celebre "antes do próximo Conselo de Goberno --que segundo os estudantes ten previsto realizarse a finais de mes--, sen excluír ningún dos colectivos convocantes e coa presenza do reitor Juan Casares".
 
"Sen estas condicións entendemos que o suposto diálogo só sería unha manobra para desmolibizar e paralizar as protestas", alegou o representante de Agir, Miguel Cuba.
 
Neste sentido os estudantes informaron que o reitorado os convocou hai dúas semanas "coa vontade de parar a mobilización do pasado mércores pero sen vontade de diálogo". "Foi unha reunión na que non se nos tomou en serio e na que simplemente nos querían explicar a Normativa coma se non soubésemos nada", lamentou Saleta Chao, da Liga Estudantil Galega.
 
Ademais da reunión para negociar unha posible reforma do texto, os colectivos recoñeceron que o equipo reitoral "se comprometeu a incluír un punto sobre a Normativa de Permanencia na próxima sesión do Consello de Goberno". Á pregunta de se a plataforma de organizacións mantivo algún contacto co resto de colectivos da comunidade universitaria, os estudantes aseguraron que houbo aproximacións "informais" por parte de membros de PAS e profesorado para apoiar a reivindicación pero "ningún contacto formal".
 
Valoración da folga
 
Así mesmo, as cinco organizacións fixeron unha valoración "positiva" da xornada de folga e da manifestación convocada o pasado mércores. Para os estudantes o seguimento do paro nas aulas foi "practicamente total" e a manifestación "logrou xuntar preto de mil persoas", algo que, segundo as organizacións, "demostra que os alumnos están concienciados con que a Normativa de Permanencia é un ataque aos seus dereitos".
 
Por último, o representante dos Comités na rolda de prensa conxunta, Daniel Candal, asegurou que as organizacións "continuarán os actos e as mobilizacións que fagan falta ata parar esta Normativa" que, ao seu xuízo, "é a maior agresión aos dereitos dos estudantes".