Os votos en branco serven para manifestar o rexeitamento ás candidaturas presentadas, pero, ao computarse e incluírse no total de votos sobre o que se calcula a distribución de escanos, elevan o listón electoral mínimo para entrar na repartición, favorecendo os partidos maioritarios.
 
Contabilízanse os votos nulos?
 
Non. Aínda que se contan na mesa electoral, en termos oficiais non teñen ningunha validez e non se contabilizan. Os votos nulos son os votos mal emitidos (os que utilizan unha papeleta diferente á do modelo oficial, os que inclúen papeletas con alteración de nomes ou nomes riscados, un sobre con papeletas de diferentes partidos ou unha papeleta sen sobre, recibo dunha compra, frases reivindicativas…), é un método para demostrar o rexeitamento ao sistema ou aos partidos que se presentan. No suposto de que o sobre de votación conteña máis dunha papeleta da mesma candidatura, computarase como un só voto válido. Ao non computarse non prexudica aos partidos minoritarios máis aló de que non se lles da o voto.
 
A abstención só se cifra
 
Nas pasadas eleccións municipais e autonómicas de maio, case doce millóns de persoas optaron pola abstención (O PP conseguiu oito millóns de votos e o PSOE seis). Pero, aínda que se realiza un reconto para cifrar as abstencións, non se teñen en conta para calcular a repartición de escanos.
 
A barreira para os minoritarios
 
A cada circunscrición correspóndelle elixir un número de deputados ao Congreso, segundo o número de habitantes que teña (a máis habitantes, máis deputados asignan). Para entrar na repartición, os partidos minoritarios teñen que conseguir polo menos o 3% dos votos que se emitan nesa circunscrición.
 
Ademais, o sistema D'Hondt, que se utiliza para a asignación de escanos, favorece a exclusión dos partidos minoritarios, ao reforzar a presenza das candidaturas que máis votos obtiveron en cada circunscrición, en detrimento da proporcionalidade. Existen outros sistemas electorais alternativos que favorecen unha repartición máis representativa. O método Sainte-Laguë e o Cociente Hare son dous deles.