En Galicia, o total de concursos ascendeu a 84 no terceiro trimestre, o que representa un incremento do 27,27% e sitúa a comunidade como a quinta con máis procesos, por detrás de Andalucía, Cataluña, Comunidade Valenciana e Madrid. Do total, a maior parte (81) foron voluntarios e unicamente tres necesarios. Así mesmo, 82 deles foron abreviados e dous ordinarios.
 
O instituto estatístico mostra, ademais, que en dous casos existía proposta anticipada e en ambas as dúas ocasións o contido incluía quita e espera.
 
Deste modo, dos 84 concursos rexistrados en Galicia, catro corresponderon a persoas físicas sen actividade empresarial (familias), e tres a empresas constituídas por persoas físicas, nove a sociedades anónimas; 64 a sociedades limitadas (un 42% máis) e catro a outro tipo de sociedades.
 
Por actividade económica, as ramas da industria sumaron 27 concursos, fronte aos oito do terceiro trimestre do ano pasado, o que supón multiplicar por máis de tres os procesos neste ámbito. Na construción producíronse 21, un 31% máis que o ano pasado. Entre estas dúas áreas suman 48 concursos, o 60% dos rexistrados entre empresas.
 
Ademais, no comercio por maior rexistráronse 11 concursos (foron 10 hai un ano); mentres que só unha empresa entrou en suspensión de pagamentos no comercio minorista e vehículos (eran cinco o ano pasado).
 
Tamén quebraron catro empresas de transportes, dúas menos que no terceiro trimestre do ano pasado, unha de hostalaría, tres de actividades profesionais, unha de inmobiliarias financeiras e seguros e outra de actividades administrativas. Foron concursadas outras catro do resto de servizos e cinco que non están clasificados, así como unha de enerxía.
 
Por número de asalariados, as máis numerosas foron as que se encontran entre 10 e 19 traballadores, con 17 casos; seguidas das que teñen entre 20 e 49, con 14 concursos; e as que teñen entrer un e dous e entre tres e cinco, con dez procesos en cada franxa.
 
En canto ao volume de negocio, as empresas máis afectadas polos concursos no terceiro trimestre foron as que facturan menos de dous millóns de euros, con 51 concursos; mentres que as que teñen un volume de entre dous e cinco millóns foron 14; as que están entre cinco e dez foron tres e as que superan os dez millóns foron sete. Outras cinco non están clasificadas.