Cerco ás baixas laborais e ao absentismo laboral. A Consellería de Sanidade declarou a guerra ás incapacidades temporais de todos os traballadores en Galicia. Primeiro, fixouse nos dos servizos sanitarios; logo, en toda a Administración, ámbitos nos que aplicou un plan de control para reducir o número de días que o seu persoal abandonaba os seus postos por motivos médicos. E partir de xaneiro aplicará estas directrices a toda a poboación da comunidade.
 
O departamento de Pilar Farjas lanzará un programa de inspección e control das baixas laborais para o próximo ano, consistente en reclamar aos seus facultativos un maior "autocontrol" á hora de asinar os partes médicos que permiten ao traballador ausentarse do seu posto de traballo por unha incapacidade médica.
 
A implantación desta estratexia consta nos presupostos autonómicos para o ano próximo. Neles sinálase a aplicación dun "programa especial de inspección e control da incapacidade temporal", que se aplicará en dous ámbitos: a administración e o resto de traballadores.
 
A Xunta vixiará os casos de absentismo no mercado laboral privado a través do "proceso de mecanización dos partes de baixa, a formación e concienciación dos médicos prescriptores e a información sobre o perfil prescriptor de forma que poida facer un autocontrol do facultativo médico", indica nos seus obxectivos para 2012 incluídos nas contas do Goberno autonómico.
 
O filtro de Sanidade non é o único para as baixas médicas. Se ben é o doutor de cabeceira o que asina o parte que permite a ausencia temporal do seu posto o traballador enfermo, a inspección da Seguridade Social intervén cando esta se prolonga no tempo e se reserva a potestade para dar de alta o empregado mesmo se existen informes médicos que avalan a súa doenza.
 
Por outro lado, os médicos do Sergas recibirán un directora dende os despachos de Farjas para que vixíen con especial celo as baixas laborais "de curta duración", é dicir, que se prolongan menos de 30 días. Sanidade dá instrucións aos facultativos para reducir estas situacións coa "mellora da xestión o control dos procesos de incapacidade temporal na poboación xeral". E é que a Xunta considera que a poboación comete excesos, polo que se fixa como obxectivo deste plan diminuír a percepción indebida" destas ausencias que se produce "de forma considerable" nestes procesos.
 
Ademais, Sanidade manterá o plan de control do absentismo iniciado xa entre os empregados públicos co obxectivo de "mellorar a taxa de absentismo tanto en persoal propio da Consellería e o Servizo Galego de Saúde coma do resto do persoal ao servizo da Administración pública de Galicia", segundo reza nas contas para 2012. Este resultado lograrase través de "adecuar as indicacións da prestación ás necesidades clínicas reais e aproximar os seus indicadores aos tempos estándar", é dicir, pechando a man non só á firma de partes de incapacidades temporais, senón tamén á duración destas. Os tempos estándar son a duración xenérica dunha baixa que o Goberno central estima en función da doenza a que se refiren. A maior parte supoñen catro días, pero no catálogo do Ministerio de Traballo existen numerosas sorpresas, pois neste grupo de catro días de repouso se inclúen diarreas, intoxicacións alimentarias, síndrome de dependencia do alcohol ou esgotamento.
 
O ano pasado, Sanidade puxo en marcha un plan de control do absentismo entre os seus traballadores. Con el, logrou rebaixar as baixas laborais en 200 partes ao día, se ben os datos do departamento de Piar Farjas comparan as 1.880 ausencias por enfermidade cada xornada coas 2.084 do ano 2008. Este plan, indica, logrou aforrar seis millóns de euros ao ano.
 
As "tensións de liquidez" que vive a Administración obrigan máis que nunca a controlar cada euro de gasto público, especialmente en materia sanitaria. A Consellería de Sanidade prevé dúas estratexias para o próximo ano nesta liña. No primeiro caso, lanzará un programa de "detección de asistencia sanitaria con terceiros obrigados ao pagamento", o que significa que os médicos deberán vixiar se poñen atención a pacientes cubertos polo sistema público ou por seguros privados. Neste caso, a detección permitiralles "facilitar a súa facturación" por parte do Sergas.
 
E é que a Xunta dixo basta a unha práctica común: que cidadáns con seguro privado se beneficien de forma gratuíta do sistema sanitario público. De feito, este ano detectou 7.000 funcionarios con dobre cobertura e agora deberán elixir entre cotizar a sanidade pública ou Muface (Mutualidade de Funcionarios Civís do Estado), o que aforrará cinco millóns, segundo a Administración. Neste caso, cada vez que acudan a un centro, ben a unha consulta ben a someterse a unha proba, o Sergas facturará o servizo á aseguradora privada.
 
Nesta liña enmárcanse outras medidas previstas na lei de acompañamento dos presupostos, como o cobramento de 10 euros pola renovación da tarxeta sanitaria en caso de extravío, deterioración ou primeira expedición ou a esixencia de polo menos seis meses de empadroamento aos inmigrantes para que poidan ser atendidos de xeito gratuíto nos centros sanitarios públicos da comunidade. Sanidade tamén quere aplicar a tesoira no seu cadro directivo. Nos presupostos indica que aplicará medidas para "reducir e simplificar a estrutura administrativa" do seu cadro directivo "en número de postos e custos", e calcula esta rebaixa en 3,2 millóns, o 10% dos 32,3 millóns destinados a "dirección e servizos xerais de Sanidade".