Para moitos dos 226.000 galegos sen emprego, as substitucións de persoal de baixa temporal na Administración constitúen unha esperanza de lograr un posto durante un tempo. Pero no afán de “controlar o gasto” en persoal a Xunta decidiu bloquear estes contratos. O ano que vén, o Goberno galego conxelará as contratacións de interinos e de persoal laboral temporal na metade das súas dez consellerías e en todos os postos de carácter administrativo.
 
O intento de fomentar a actividade económica choca cuns orzamentos para o ano que vén que regresan ao nivel de 2006 e que pechan a porta ás chamadas listas de interinos. "Durante o ano 2012 non se procederá á contratación de novo persoal laboral temporal nin ao nomeamento de persoal estatutario temporal, nin ao nomeamento de persoal funcionario interino", indican os orzamentos para o próximo exercicio, seguindo a senda de contención de gasto marcada o ano pasado.
 
A Xunta exclúe destas restricións as áreas sociais, xustiza e urxencias. No primeiro caso, permitirá as substitucións nos centros de ensino, tanto de profesores como de persoal non docente, nos centros asistenciais do Sergas, centros sociais (centros de día ou residencias), membros do servizo contra incendios forestais, xustiza, urxencias e protección civil. "As contratacións adecuaranse estritamente ás necesidades do servizo e terán como límite máximo as previsións orzamentarias establecidas", indican os orzamentos.
 
Así, só se permitirá cubrir as substitucións en Sanidade, Educación, Benestar, unha parte de Presidencia e os incendios, dependentes de Medio Rural. No resto contención absoluta: as baixas deberán cubrirse co traballo dos funcionarios máis "próximos", como declarou a conselleira de Facenda, Marta Fernández Currás, o ano pasado, cando xa se conxelaron as substitucións. Iso si, o seu departamento non pecha a porta a excepcións. Facenda terá potestade para levantar este veto, pero deberá recibir unha "memoria explicativa que xustifique a necesidade urxente e inaprazable e o carácter imprescindible para o funcionamento do servizo " por parte do departamento que requira a cobertura dunha baixa. Nesta liña enmárcase tamén a reforma legal do ano pasado para poder trasladar funcionarios dun departamento a outro para cubrir as necesidades da Administración. A Xunta non ofrece información sobre si se están aplicando estes cambios de destino, que primeiro se quixeron impor de forma obrigatoria e logo tomaron carácter voluntario.
 
A contención á hora de cubrir baixas choca coas protestas de dous colectivos claves supostamente exentos dos recortes: profesores e sanitarios. Estes realizarán unha protesta o mércores en Santiago e ameazan cunha folga xeral catro días antes das eleccións xerais no caso de que a Consellería de Sanidade non atenda as súas queixas, centradas na aplicación dunha taxa de reposición do 10%: é dicir, que das 1.760 xubilacións do ano próximo só se cubrirán 176. O departamento de Farjas alega que esa taxa vén fixada por normativa estatal e non ten marxe para incumprila.
 
O ambiente na educación tamén está quente, a mobilización continúa  ante o aumento da carga lectiva do profesorado, que provocaría 1.000 despedimentos.
 
A falta de persoal provoca, directamente, unha diminución da calidade e cantidade na atención á cidadanía que marca o camiño cara a paulatina privatización e eliminación do estado de ben estar, só terán atención os que a poidan pagar, as clases máis desfavorecidas ou non poderán acceder aos servizos ou estes acabarán tendo a mesma cobertura que se foran de caridade.