Os conselleiros e directivos das tres caixas que acaban de ser parcialmente nacionalizadas son os que máis incrementaron as súas remuneracións entre 2004 e 2010, a cúpula de CatalunyaCaixa e a de Caixas de Aforro do Mediterráneo case duplicaron as súas remuneracións -con aumentos do 93 e do 94%, respectivamente- a pesar de que os beneficios das entidades caeron un 53% no caso da entidade catalá e un 3% na alacantina. Por detrás delas sitúase Novacaixagalicia, cuxos máximos responsables cobraban o ano pasado un 68% máis que seis anos atrás, a pesar de que os resultados nese mesmo período se derrubaron un 47%.
 
A remuneración media do consello de administración e da alta dirección das quince maiores entidades financeiras do estado, entre bancos e caixas, experimentou un crecemento do 48% dende 2004 a 2010, mentres que os beneficios neste período se incrementaron un 27%. As remuneracións nas nove grandes caixas aumentaron un 47% nestes anos, mentres que o beneficio se reduciu un 7%. Nos seis grandes bancos, o soldo da cúpula creceu un 42%, algo menos que os beneficios (+46%).
 
O informe, elaborado con datos da Comisión Nacional do Mercado de Valores (CNMV) e dun total de 52 entidades sobre goberno corporativo e memorias anuais, destaca tamén que a contía de préstamos que as entidades concederon aos seus conselleiros se disparou nas caixas con problemas "con coñecemento do supervisor".
 
Os préstamos aos conselleiros aumentaron en 436 millóns de euros nos seis exercicios estudados. Dese total, o 80% correspondeu a catro caixas de aforros: Novacaixagalicia (147,5 millóns de euros), Caixa Douro-España (82,4 millóns), Catalunyacaixa (64,1 millóns) e CAM (62,9 millóns).
 
Fonte: xornais